Mukanda wa Chizavu cha Tusongo

Mandumbu a Zango Akwa-Kwambujola-ni-Akwetu:

Chili kuyuka chinene kulinunga hamuwika hanga tuwayile Zambi umuwika wamwenemwene, Yehova! Tuli “akwa milimo-ni-akwo a Zambi,” waze hanatwehe mulimo usandu wa kwambujola ni kulongesa sango lipema lia Wanangana wenyi lize linalamwina mwono wa atu. (1 Kori. 3:9; Mateu 28:19, 20) Twatamba kupwa akulilulieka kanawa mba tulinge kanawa mulimo uno ni sambukila ni kulinunga hashi heswe.—1 Kori. 14:40.

Mukanda uno muukukwasa kunyingika chize chikungulwila cha akwa-Kristu chakukalakala musono. Unalumbununa milimo ni yiteli yize Chela cha Yehova mweswe akwete. Nyi mulemesa yiteli ye ni kulinga kanawa milimo ye, ‘ufulielo we muukola.’—Yili. 16:4, 5; Ngala. 6:5.

Kashika, tunakukolweza hanga ulilongese kanawa mukanda uno. Sako tachi ukaule yuma yize mutangamo ku mwono we. Nyi uli mukwa-kwambujola mwaha yoze kanda achipapachisa, yika watamba kulinga mba akupapachise? Chikwo nawa, nyi hanakupapachisa kulu, yika watamba kulinga mba ukole ku ufulielo ni kulakala chinji mu mulimo wa Yehova? (1 Timo. 4:15) Kuchi muhasa kukwasa chikungulwila hanga chipwe ni sambukila? (2 Kori. 13:11) Muwana makumbululo a yihula yino mu mukanda uno.

Nyi uli ndumbu yoze hanapapachisa, yika watamba kulinga mba ujame ni kupwa kavumbi, mba kulutwe ukapwe mukulwana wa mu chikungulwila? Kunafupiwa chinji ukwaso wa mandumbu waze ajama hanga atambule yiteli, mumu tununu a tununu twa atu kananjila mu ululikiso wa Zambi. Mukanda uno, muukukwasa kunyingika yize yinalumbunuka ‘kufupa’ kupwa ni yiteli ya ku ufulielo.—1 Timo. 3:1.

Tunalembe ni mbunge yeswe hanga mukanda uno ukukwase kumona chihela che mu ululikiso wa Yehova ni kuchilemesa. Nyingikenu ngwenu, twanuzanga chinji nawa tunanungu ni kulemba hanga nupwe mukachi ka atu waze makawahilila ku miaka yeswe ha kuwayila Tata yetu wa mu malilu, Yehova.—Samu 37:10, 11; Iza. 65:21-25.