3
Kuchi Munguhasa Kuhanjika ni Yisemi Jami?
YIKA WATAMBA KULINGA?
Achinyonga ha chino: Lili tangwa Liamatatu ufuku. George kali ni miaka 17. Muze hahwisa mulimo wenyi wa kuzuwo, mafupa kuya ni kuhwima! Mapola ha TV ni kutwama ha chitwamo chenyi akuzanga chinji.
Susumuku, Tato kanamana ku chikolo, aku uli anevu.
“George! Mumu liaka unakisa mashimbu ni kutala TV shimbu ukwase mwanakwenu milimo ya ku shikola? Ena kushi kuzanga kulinga yize akukulweka!”
“George malinyenyeta aku Tato kanamwivu, ngwenyi, “Lamba hiliaputuka nawa.
Tato mahetama ni kwamba ngwenyi: “Ngwe kuchi?”
“George mahwima, matala mwilu nawa makumbulula ngwenyi, “Nichimwe, Tata.
Tato kanevu uli unji. Mamba ngwenyi, “Kanda ungukumbulula chocho, unevu ko.
Nyi yena uli George, kachi te kuchi muhasa kukumbulula?
CHITANGU NYONGA!
Kuhanjika ni yisemi je chili ngwe kwendesa mashinyi. Nyi wawana mawe mu tapalo, muhasa kukondoloka.
CHAKUTALILAHO:
“Mwana pwo anavuluka ngwo LeiIa yamba ngwenyi, “Nakupinda chinji kuhanjika ni Tata. Ha mashimbu amwe muze nakuhwisa kuhanjika nenyi, iye mamba ngwenyi, ngukonekene, ni yami te unahanjika kuma?”
LEILA KALI NI JILA JITATU.
Kukalumiokena tato.
Leila kakukalumioka ngwenyi, “Ivwa Tata, ai yili ni ulemu!”
Kwecha kuhanjika ni tato.
Leila malitwamina kuhanjika ni tato ahone kumulweza yuma yize yinamupinjisa.
Kushimbwila ola yinalite, mba ahanjike cheka yuma yacho.
Leila mahanjika ni tato hanji kumusonekena mukanda ha kapalia yoze ali nenyi.
Jila yika muzanga kulweka Leila hanga akaule?
NYINGIKA: Tato ya Leila kali ni kunyonga yuma yinji, kashika, kanyingikine chize mwanenyi anevu. Nyi Leila masakula Jila A, tato kechi kunyingika mumu liaka Leila anakalumioka. Nyi Leila nawa makaula jila yino tato kechi kumupanjika, nawa masolola ngwe kanahono vumbi tato. (A-Efwesu 6:2) Chochene, kulinga chino kuchichi kumukwasa.
Ngwe chize muhasa kukondoloka mawe hanga uhete kuze unayi, muhasa kuwana jila yakuhetela mo kuli yisemi je
hipwe ngwe Jila B, ye yashi kukaula, alioze hi chipemako kuyikaula. Mumu liaka? Mumu Leila katamba kulweka tato mulonga uze alinawo, mba amukwase kuhwisa mulonga wacho. Nyi mahola tato kechi kuhasa kumukwasa.
Nyi makaula Jila C, Leila kechi kwecha kapinda wacho amukinde kuhanjika ni tato. Alioze, meseka kuhanjika yuma yacho ha shimbu lieka. Nyi masoneka mukanda kuli tato, Leila mevwa hwo ku mbunge.
Kusoneka mukanda necho muchimukwasa kunyingika kanawa yize atamba kusoneka. Muze tato matanga mukanda wacho, mahasa kunyingika yize Leila te anazange kumulweza, ni kumukwasa kunyingika kanawa kapinda ali nenyi. Kashika, Jila C muyihasa kukwasa Leila ni tato. Kuhanjika nenyi hanji kumusonekena mukanda, yili jila yinakaula utowezo wa mu Mbimbiliya uze unambe ngwo, “tukaulenu yuma yize yatwala ku sambukila.”—A-Roma 14:19.
Jila yikwo yika Leila mahasa kusakula?
Tala nyi muhasa kunyonga yimwe, ni kuyisoneka ha chihela achi chili mushi. Soneka chize jila yacho muyihasa kukukwasa.
KANDA UPWA NI MALIMI AALI
Ewuluka ngwe, yize wakwamba ni yize yisemi je akunyonga ha yize wakwamba ha mashimbu amwe kuyichi kupwa ni kulita.
CHILWEZA:
Nyi yisemi je makuhula ngwo mumu liaka unanyenganyana. Ena mukumbulula ngwe “Chazangile kuhanjika ha yuma yacho.”
Alioze yisemi je mevwa ngwe unambe ngwo: “Chichi kunulweza mumu chishi kunujikijila. Kapinda mweswe mungupwa nenyi mungupwa ni kulweza wika masepa jami.”
Achinyonga kama nyi unalipikala ni umwe kapinda, nawa yisemi je kanazange kukukwasa. Alioze mwamba ngwe: “Kanda nulipikala. Munguhasa ukawami.”
Yisemi je mahasa kwivwa ngwo?
Muhasa kukumbulula kanawa ngwe?