Alama ni Eva Yehuka Zambi

Limwe tangwa muze Eva te ali ukawenyi, umwe kapela yahanjika nenyi. Yamuhula ngwenyi: ‘Kuma Zambi hanambe ngwenyi, kanda nulia ku mitondo yeswe ya mu munda nyi?’ Eva yakumbulula ngwenyi: ‘Mutuhasa kulia ku mitondo yeswe ya mu munda, alioze mutondo uli mukachi ka munda, ka. Mumu nyi mutulia muhuko wa mutondo wacho, kumutufwa.’ Kapela ngwenyi: ‘Kunuchi kufwa. Mumu nyi munuliako, munupwa ngwe Zambi.’ Shina uno te umwenemwene? Ka, wano te mahuza. Alioze Eva yaatayiza. Chocho, Eva yalihulikila ku muhuko wacho, ni kuputuka kuuzanga chinji. Aye yalia muhuko wacho nawa yauhana kuli Alama. Alama kanyingikine ngwenyi, ayo te kumafwa nyi mahona kwononokena Zambi. Chipwe chocho, Alama yalia muhuko wacho.

Ha chingoloshi, Yehova yahanjika ni Alama ni Eva. Iye yaahula mumu liaka ahonene kumwononokena. Eva yalamikiza kapela, alioze Alama yalamikiza Eva. Hachino, Yehova yaatuhwisa mu munda wa Endene, mumu kakamwononokene. Chocho, Yehova yasa angelo ni katana wa kahia ku unjililo wa munda, hanga Alama ni Eva achine kufunamo.

Yehova yamba ngwenyi, mweswawo wongele Eva neye te mamumwesa lamba. Hi kapela wamwenemwene ko wahanjikile ni Eva. Mumu Yehova kakatangile tupela hanga ahanjike. Alioze mungelo mupi mwe walingishile kapela mba ahanjike. Kalingile chino hanga wonge Eva. Mungelo wacho mwe avuluka ngwo, Satana Ndiapu. Kulutwe, Yehova makwonona Satana, hanga achine kwonga nawa atu.