Yakomba ni Esau Yalivwashana

Yehova yalakenya Yakomba ngwo te mamufunga ngwe chize afungile Apalahama ni Izake. Yakomba yaya ni kutwama ku chihela kuze te avuluka ngwo Harane, koko yambata, yapwa ni usoko unene, nawa yapwa pichi.

Hakupalika cha mashimbu, Yehova yalweza Yakomba ngwenyi: ‘Hiluka ku chifuchi cha atatenu.’ Hachino, Yakomba ni usoko wenyi, yalinga wenyi wakufuna ku chifuchi cho. Mu jila amwe atu yeza kuli Yakomba ni kumulweza ngwo: ‘Yayenu Esau, kaneza ni kukupatwiza hamwe ni malunga 400!’ Yakomba yevwa woma unji. Iye yanyonga ngwenyi, Esau kanazange kungulinga upi hamwe ni usoko wami. Chocho, yalemba kuli Yehova ngwenyi: ‘Ngunaliumbu, ungupulule ku kwoko lia ndumbwami.’ Ha tangwa lize liasulileho, Yakomba yatumina Esau chawana cha mapanga, pembe, ngombe, tumelu, ni yimbulu anji.

Ha ufuku wacho muze Yakomba te ali ukawenyi, aye yamona umwe mungelo! Mungelo wacho yaputuka kulilamba ni Yakomba. Ayo yalilamba ufuku weswe. Chipwe ngwe Yakomba kamusengunwine, nihindu kakechele mungelo hanga aye. Mungelo yamwamba ngwenyi: ‘Ngweche hanga nguye kwami.’ Alioze Yakomba yamba ngwenyi: ‘Ka, chichi kukwecha, ndo unguwahise.’

Hi kusongo, mungelo yawahisa Yakomba. Chocho, Yakomba yanyingika ngwenyi, Yehova te kechi kwecha hanga Esau amulinge upi.

Ha chimene, Yakomba yamwena Esau kusuku kaneza hamwe ni malunga 400. Muze ahetele hakamwihi, Yakomba yalianga hamwe ni usoko wenyi, yafulamana kulutwe lia yayo yisuho shimbiali. Esau yazomboka ndo kuli Yakomba yalisambilila. Eswe ni aali yaputuka kulila, chocho yalivwashana umwe ni mukwo. Kuchi wanyonga, shina Yehova kanakawahilila ha chize Yakomba ahwishile mulonga ni yayo?

Muze hahwisa, Esau yaya ku zuwo lienyi ni Yakomba neye yaya ku zuwo lienyi. Yakomba kapwile ni ana a malunga 12. Majina jo te, Rupene, Simeone, Levi, Yunda, Ndane, Napatali, Ngate, Ashe, Isaka, Zapulone, Yosefwe ni Mbenjamine. Umwe wa kuli ana jacho—Yosefwe—kamuzachishile kuli Yehova hanga alamwine mwono wa atu Jenyi. Ena unanyingika chize iye achilingile? Tutalenu.