Ngendeshi Kumi ni Aali

A-Izalele yawuchika Mulundu Sinai, yanunga ni wenyi wo mu puya ya Parane ndo ha chihela chize te avuluka ngwo Kandeshe. Koko, Yehova yalweza Mose ngwenyi: ‘Tuma malunga 12, aku minyachi yeswe, hanga aye ni kutala chifuchi cha Kanana, che chifuchi mungukahana kuli A-Izalele.’ Hachino, Mose yasakula malunga 12 ni kwaalweza ngwenyi: ‘Yenu ku Kanana nukatale nyi mavu jako apema kulimako kulia. Talenu atu jako nyi yitakame, nyi alelu; nawa nutala nyi katwama mu mambalaka nyi mu mambonge.’ Ngendeshi 12, kuchingako Yoshua ni Kalemba yaya ku Kanana.

Muze te hikwapalika matangwa 40, ngendeshi yafuna, yaneha, figu, romana ni uva. Ngendeshi yamba ngwo: ‘Mavu jako apema, alioze atu waze atwamako yitakame, nawa mbonge jako jili ni yikalakala yikolo.’ Alioze Kalemba yamba ngwenyi: ‘Mutuhasa kwaakumba. Tuyenuko haliapwila!’ Unanyingika mumu liaka Kalemba ambile chocho? Mumu iye ni Yoshua te kafuliela muli Yehova. Alioze ngendeshi akwo 10, yamba ngwo: ‘Ka! Atu jako yitakame, ngwe yindululu! Yetu tuli ngwe mapasu kumeso jo.’

Maliji wano kahongesele chinji A-Izalele. Ayo yaputuka kulinyenyeta ni kuliamba ngwo: ‘Tusakulenu kasongo mweka hanga tufune ku Engitu. Mumu liaka twatamba kuya ku chifuchi chize matushiha?’ Yoshua ni Kalemba yamba ngwo: ‘Kanda twehuka Yehova, nawa kanda tupwa ni woma. Yehova makatufunga.’ Alioze A-Izalele kakapanjikileko. Ayo yafupa kushiha Yoshua ni Kalemba!

Yika te Yehova malinga? Iye yalweza Mose ngwenyi: ‘Hi nalinga yuma yinji hali A-Izalele, nihindu ayo keshi kungwononokena. Kashika ayo manunga mupuya ha miaka 40, nawa momwene makafwila. Kuchizako wika ana jo ni Yoshua ni Kalemba e makatwama mu chifuchi cha chilakenyo.’