Rute ni Noemi

Ha limwe shimbu muze mu Izalele te muli zala yinji, umwe Ka-Izalele yoze te avuluka ngwo Noemi, yaya ku mbonge ya Moape ni mukwo-lunga hamwe ni ana jo aali. Hakupalika cha mashimbu, lunga lia Noemi yafwa. Ana jenyi yambata mapwo aku Moape, Rute ni Orpa. Chaluyinda, hakupalika cha mashimbu, ana ja Noemi no yafwa.

Muze Noemi evwile ngwo zala mu Izalele hiyahwa, yazanga kuhiluka kumahio. Rute ni Orpa yaya hamwe nenyi, alioze muze apwile mu jila, Noemi yaamba ngwenyi: ‘Enu nwapwile mapwo apema kuli ana jami nawa matembwa-anami apema kuli yami. Ngunazange hanga nukambate cheka. Hilukenu kumahienu ku Moape.’ Ayo yamwamba ngwo: ‘Etu twakukuzanga chinji! Kutwazangile kukuhichika.’ Chipwe chocho, Noemi yanunga ni kwaalweza hanga ahiluke kwo. Chocho, Orpa yahiluka kwenyi, alioze Rute yasala nenyi. Noemi yamwamba ngwenyi: ‘Orpa kanahiluka kuli atu jenyi ni kuli tuzambi twenyi. Yako nenyi hamuwika.’ Alioze Rute yamba ngwenyi: ‘Ami chichi ku kuhichika. Atu je kumakapwa atu jami, nawa Zambi ye kumakapwa Zambi yami.’ Shina muhasa kunyonga chize Noemi evwile muze Rute ambile maliji wano?

Rute ni Noemi kahetele ku Izalele muze te anaputuka kucha sevada. Limwe tangwa, Rute yaya ni kuhuhujola mbuto yize te yakusala mu minda ya lunga yoze te avuluka ngwo Mboaze, mwana wa Rahape. Iye kevwile ngwo Rute Ka-Moape kanungine ni kushishika kuli Noemi. Hachino, Mboaze yalweza akwa-milimo yenyi awuchike mbuto mu munda hanga Rute ahuhujole.

Muze Rute hafuna ku zuwo, Noemi yamuhula ngwenyi: ‘Mu minda yaya wahuhujola musono?’ Rute yamba ngwenyi: ‘Mu minda ya lunga yoze avuluka ngwo Mboaze.’ Noemi yamulweza ngwenyi: ‘Mboaze kali usoko wa lunga-liami. Nunga ni kukalakala mu minda yenyi hamwe ni ana mapwo akwo. Ku minda jenyi makufunga kanawa.’

Rute yanunga ni kukalakala mu minda ya Mboaze ndo muze kucha chahwile. Mboaze kanyingikine ngwenyi, Rute te kakuhondangana chinji nawa te pwo mupema. Ha matangwa jacho, nyi lunga mafwa chakuhona kusema ana, usoko wenyi malimbata ni tuliwa yoze iye ahichika. Hachino, Mboaze yalimbata ni Rute. Mba yasema mwana umuwika yamuvuluka ngwo Opete, yoze kulutwe lia matangwa yapwa kako ya Mwanagana Ndawichi. Masepa ja Noemi yawahilila chinji. Ayo yamba ngwo: ‘Chitangu, Yehova kakwaha Rute, yoze wakukukwasa chinji, haliapwila hakwaha nawa mujikulu. Yehova afumane.’