Hana Yalemba Hanga Apwe ni Mwana

Ka-Izalele yoze te avuluka ngwo, Elekana kapwile ni mapwo aali, Hana ni Penina, alioze iye kazangile chinji Hana. Penina kapwile ni ana anji, kashika te akulenya Hana mashimbu eswe mumu kakapwile ni mwana. Hita mwaka, Elekana kapwile ni kuya ni usoko wenyi ku uwayilo mu tabernakulu ku Shilo. Limwe tangwa muze te achili ku Shilo, aye yamona ngwenyi mukwo-pwo yoze te azanga chinji kapwile ni chinyengo. Yamba ngwenyi: ‘Lisesa Hana kanda ulila. Yena uli ni yami. Nakukuzanga chinji.’

Kulutwe lia yino, Hana yaya kwaukawenyi hanga alembe. Aye kakechele kulila muze te anete kuli Yehova hanga amukwase. Iye yalakenya ngwenyi: ‘Yehova nyi mungwaha mwana, mungukakwaha yo, hanga akakulingile ku mwono wenyi weswe.’

Sasendote wa Lutwe, Eli, yamona Hana kanashikwoka, iye yanyonga ngwe kanazengewa. Hana yakumbululula ngwenyi: ‘Ka, mwata, chanwine walwa. Nguli ni yipikalo yinji, kashika ngunayilweze kuli Yehova.’ Eli yanyingika ngwenyi kamba chipi, chocho, yamulweka ngwenyi: ‘Zambi yami akwehe cheswacho unafupu.’ Hachino, Hana yalivwa kanawa chocho yaya kwenyi. Kwakakumbanyine mwaka umuwika, aye yapwa ni mwana yamuluka jina Samuele. Hana kevwile chiseke chinji!

Hana kakavulamine chilakenyo chize alingile kuli Yehova. Muze asumwine Samuele ku yamwa, yamutwala hanga akalakale ku tabernakulu. Yalweza Eli ngwenyi: ‘Yono mwe mwana napwile ni kwita mu yilemba yami.’ Namuhana hanga alingile Yehova ku mwono wenyi weswe. Elekana ni Hana kapwile ni kumeneka mwano hita mwaka ni kumutwalila mazalo aha. Kulutwe, Yehova yahana nawa Hana ana atatu a malunga ni aali a mapwo.