Pwo ku Shima Lia Meya

Muze Chizomboka hi chahwa, Yesu ni tumbaji twenyi yapalikila mu Samaria hanga aye ku Ngalileya. Hakamwihi ni mbonge ya Saika, Yesu yamana ha chihela chize te avuluka ngwo shima lia Yakomba. Muze te anahwima, tumbaji twenyi yaya mu mbonge ni kulanda kulia.

Umwe pwo yeza ku shima hanga atahe meya. Yesu yamwamba ngwenyi: “Ngwehe kama meya hanga ngunwe.” Pwo wacho yamba ngwenyi: ‘Mumu liaka unanguhanjikisa? Ami nguli pwo Ka-Samaria. Mumu A-Yunda ni A-Samaria keshi kulihanjikisa.’ Yesu yamulweza ngwenyi: ‘Nyi te unangunyingika, kachi wangwita meya nawa kachi nakwaha meya a mwono.’ Pwo yamuhula ngwenyi: ‘Yika unambe kwamba? Yena kuushi ni chikashi nichimwe.’ Yesu yamulweza ngwenyi: ‘Mweswawo manwa meya waze mungumwaha, kechi kevwa nawa pwila.’ Pwo yamba ngwenyi: “Mwene, ngwehe kama meya jacho.”

Mba Yesu yamulweza ngwenyi: ‘Yako hanga wize ni mukwenu lunga kuno ku shima.’ Pwo yamba ngwenyi: ‘Ami kungushi ni lunga.’ Yesu yamwamba ngwenyi: ‘Wamba umwenemwene. Hihunalimbate ni malunga atano, haliapwila watwama ni lunga yoze kuwalimbachile nenyi.’ Pwo yamba ngwenyi: ‘Ngunamono ngwami yena uli profeta. Atu jetu kakufuliela ngwo mahasa kuwayila Zambi ku mulundu uno, alioze A-Yunda kakwamba ngwo mutuhasa kuwayila wika mu Yerusaleme. Ami nafuliela ngwami muze Mesaya meza, makatulweza chize mutuwayila.’ Chocho Yesu yamulweza chimwe chuma chize te kanda achilweza kuli mutu niumwe, ngwenyi: ‘Ami mwe Mesaya.’

Pwo yazombokela ku mbonge yenyi ni kulweza A-Samaria ngwenyi: ‘Hi nawana Mesaya. Iye kananyingika yeswe hakutwala kuli yami. Tuyenu hanga numumone!’ Ayo yamukaula ndo ku shima nawa yaputuka kupanjika malongeso ja Yesu.

A-Samaria yasanyika Yesu hanga atwame mu mbonge yo. Ha matangwa aali iye yaalongesa, nawa anji akuli ayo yamufuliela. Ayo yalweza pwo Ka-Samaria ngwo: ‘Muze hitwapanjika lunga yono, mba hitwanyingika ngwetu kuma kali lume chilamwina wa hano hashi.’