“Wanangana Wenu Wize”

Yehova hanalakenya ngwenyi: ‘Kukuchi kapwa miteto, lamba, yikola chipwe kufwa. Mungukakusumuna masoji eswe ku meso jo. Yuma yeswe yipi muyikahwa.’

Yehova kasele Alama ni Eva mu munda wa Endene hanga atwame ni sambukila hamwe ni chiseke. Ayo te mawayila Tato wa mu malilu ni kuzalisa hashi ni ana jo. Alama ni Eva kehukile Yehova, alioze upale wenyi kuwakalumukine. Mu mukanda uno, hi twamona ngwetu yuma yeswe yize Zambi akulakenya yakumanunuka. Wanangana wenyi muukaneha yiwape yipema hano hashi, ngwe chize alakenyene kuli Apalahama.

Kwasala hakehe, Satana ni andemoniu jenyi, ni atu eswe api makaanongesa. Eswe waze makasala ni mwono makawayila wika Yehova. Kutuchi kayiza chipwe kufwa. Alioze, hita tangwa mutukapwa ni kuhinduka ni tachi ni chiseke ku mwono. Hashi heswe muhakapwa paraisu. Atu eswe makapwa ni kulia ni mazuwo apema. Atu makapwa yimbovu, hi yilianyi hanji yingalwe ko. Tushitu amu yambu keshi katwivwila woma ni yetu kutuchi kaevwila woma.

Mutukawahilila chinji muze Yehova makaputuka kuhindwisa atu waze hanafu. Mutukatambula atu aku mashimbu akunyima, ngwe, Abele, Noa, Apalahama, Sara, Mose, Rute, Estere ni Ndawichi. Mutukakalakala no hamuwika hanga tululieke Hashi hapwe paraisu. Mashimbu eswe mutukapwa ni kulinga milimo yinji yipema.

Yehova kanazange hanga ukapwe mu paraisu. Mukamunyingika kanawa kuhiana. Kashika, tukundamenu kuli Yehova matangwa eswe, haliapwila ni kulutwe lia matangwa!