Mukanda wa Chizavu cha Tusongo

Mandumbu Jetu a Zango:

Zango lietu kuli Zambi ni hali atu liakutukwasa hanga ‘tuye ni kulongesa atu a ku mavungu eswe hanga apwe tumbaji, ni kwapapachisa.’ (Mateu 28:​19, 20; Marku 12:​28-31) Zango likwete ndundo. Zango mulihasa kukwata ku mbunge ja waze apwa “akwa-kulikehesa ni kuzanga kupwa ni mwono wa mutolo.”—Yili. 13:48.

Ku mashimbu akunyima, twapwile ni kulihulikila chinji ha kupachikila mu mbunge maliji a kuputuka no lusango ni kuhana mikanda. Haliapwila twatamba kusa tachi hanga tululieke utotombo wetu wa kuhanjika kanawa. Tunazange kusolwela akwetu zango ha kuhanjika no yuma yize ayo mazanga. Chino chakufupiwa kupwa atu ashi ni kunyingika kanawa yize mutu ni mutu anafupiwa. Mba kuchi kamukanda kano mukahasa kutukwasa ha chikuma chino?

Kamukanda kano kali ni malongeso 12 waze matukwasa kupwa ni yitanga yize tunafupiwa hanga tusolole zango ni kupwisa atu tumbaji. Hita longeso linakatuka ha lusango wa mu Mbimbiliya yoze unashindakenya ha yitanga yize Yesu ni Akwa-Kristu a ku sekulu yitangu asolwele mu mulimo wo wa kwambujola. Kashika chiteli chetu chili chino: Kanda tulihulikila ha kupachikila mu mbunge maliji a kuputuka no lusango, alioze tufupenu majila akusolwelamo zango kuli atu. Hita chitanga, chinafupiwa chinji mu mulimo wetu wa kwambujola. Kashika, mutumona chize hita chitanga muchitukwasa muze mutuputuka lusango, mutufuna ni kumeneka hanji mutusongwela malongeso a Mbimbiliya.

Muze mutanga hita longeso, nyonga ha chize muhasa kusolola chitanga chize unalilongesa muze muhanjika ni atu ku chihela kuze watwama. Sako tachi hanga uzange chinji Yehova ni atu. Zango liacho mulikukwasa kumanununa mulimo we wa kulongesa atu ni kwapwisa tumbaji.

Tunasakwila chinji ha chiwape chino chilemu cha kukalakala hamuwika ni yenu. (Zefa. 3:9) Yehova anunge ni kunuwahisa ha tachi jize munusa hanga nununge ni kuzanga atu ni kwapwisa tumbaji!