Shina Chili Chipi Kunenganyana?

Hi unapinji kama ni yikola limwe tangwa? Hanji yiuhinduka kawashi-washi, nikuvulama yikola yacho. Alioze yinyengo ya kufwisa mutu, kuyatwamine chocho. Dr. Alan Wolfelt kasonekene mu mukanda wenyi uze unahanjika ha kuhuzulula mbunge ya tuliwa, ngwenyi: “Kukushi nichimwe chuma chikalu ‘kuvulama’ ngwe yinyengo.” (Healing a Spouse’s Grieving Heart.) Mba yawezela nawa ngwenyi: “Ni ukwaso wa akwetu, ha kupalika cha mashimbu yikola yetu muyihasa kukeketela.”

Tutalenu chimwe chilweza cha kalamba ketu Apalahama chize evwile, muze mukwo-pwo afwile. Mbimbiliya yinambe ngwo, “Apalahama yeza mukulinyenga mumu hali Sara, nikumulila.” Liji “yeza” linasolola ngwo kwapalikile amwe mashimbu mba iye ahuzuluke ku yinyengo yenyi.a Chilweza chikwo chili cha Yakomba, yoze ongele ngwo mwanenyi Yosefwe kamushihile kuli umwe kashitu. Iye kevwile yinyengo ha “matangwa anji,” chipwe akwa-jiko lienyi te keshi kuhasa kumutakamisa. Chipwe muze te hi kwapalika miaka yinji nihindu kufwa cha Yosefwe te chakumuvwisa yinyengo yinji.—Uputukilo 23:2; 37:34, 35; 42:36; 45:28.

Chizechene nawa, ni musono atu anji kakwivwa yinyengo yinji nyi hafwisa mutu yoze akuzanga chinji. Tushimutwinenu yilweza yaali.

• “Lunga liami Robert, kafwile 9 Julho 2008. Ha chimene chize alingile acidente, chakalisele ni chimene cha matangwa akwo. Muze te hitwahwisa kunwa kafe ngwe chize te twakulinga shimbu kanda achiya ni kukalakala, yitulimbejala, ni kumwamba ngwenyi, ‘Nakukuzanga chinji.’ Chipwe ngwe hikwapalika miaka yisambano, nihindu nguchili ni yikola mu mbunge. Nakumona ngwe kuchishi kuhuzuluka ku yinyengo yami.”—Gail, miaka 60.

• “Chipwe ngwe chishi hamwe ni pwo-liami ha miaka 18, nihindu nakwivwa usona wenyi, nawa kufwa chenyi chakungunehena yinyengo yinji. Mashimbu eswe nyi namona chimwe chuma chize chakungukwata ku mbunge, chakungwiwulula mukwetu-pwo, nawa nakunyonga chize te neye mevwa nyi mamona chuma chacho.”—Etienne, miaka 84.

Kwamba umwenemwene, yikola hamwe ni yinyengo yamutapu au yakulingiwa. Mutu ni mutu kakwivwa yinyengo mu jila yalisa, kashika hi chipema ko nyi mutunyongena akwetu chipi ha chize akwivwa yinyengo yo. Nawa kutwatambile kulinyongena chipi yetwene ha chize mutwivwa nyi twafwisa mutu yoze twakuzanga chinji. Kuchi mutuhasa kuhuzuluka ku yinyengo yetu?