Tulieswe Twakufupa Utakamiso

Muhasa kwiwuluka limwe tangwa walimbukile hashi muze te uchili kanuke? Kota walilemekene ku kwoko hanji ha kungunwa. Unewuluka muze noko akulembejekele? Hanji yakosa ha chilonda che ni kukasaho hina. Hanji yiulila, alioze hamukunda wa maliji jenyi apema ni chize akukangayikile mu kondo, yiulivwa kanawa. Ha mashimbu jacho, utakamiso wapwile hakamwihi ni yena.

Alioze mwono wakukaliwa chinji muze mutu anayi ni kukola. Muze lamba mulioka chakupwa chikalu kuwana utakamiso. Mba ukalu wa makulwana, keshi kuuhwisa ni mahina hanji kukangayika kuli chisemi. Tutalenu yimwe yilweza.

• Hiunapalika mu kapinda wakukuchiza ha mulimo? Juliano ngwenyi kevwile yikola yinji ku mbunge muze amuchijile ha mulimo. Mba yalihula ngwenyi: ‘Kuchi mungulela usoko wami? Miaka yipwahaha nahondangana, kuchi anamono haliapwila ngwo nguli wamokomoko?’

• Hanji yikola unevu hakufwa cha ulo we. “Rakele yamba ngwenyi: “Hi mwapalika tukweji 18 chize haze lunga liami anguhichikile. Ha shimbu liacho nevwile yikola yinji. Nevwile ngwe mbunge yami kayitetele yihanda yali.” “Yikola nevwile yapwile ya mu mujimba ni mu manyonga. Nawa yangunehenenene mwongo.”

• Hanji uli ni musongo unene uze unasoloka ngwe kuushi kuhwa. Hanji muhasa kwivwa ngwe chize evwile kalamba Yombi, yoze wambile ngwenyi: “Mwono wami hiwangupihila; chazangile kutwama ni mwono ndo ku miaka.” (Yombi 7:16) Hanji muhasa kwivwa ngwe Lufunda, umwe lunga wapwile ni miaka 80, yoze wambile ngwenyi, “Mashimbu amwe nakwivwa ngwe ngunashimbwila wika kufwa.”

• Hanji unafupiwa utakamiso ha mukunda wa kufwa cha usoko we. Lote ngwenyi: “Muze mwanami afwile mu ndeke yize yaholokele, chitangu te chatayijile.” “Mba yinguputuka kwivwa yikola, ngwe ya katana yoze Mbimbiliya yakwamba ngwo mahasa kutuwa ku mbunge ya mutu.”—Luka 2:35.

Lote, Lufunda, Rakele, ni Juliano yawana utakamiso, muze te anapalika mu kapinda. Yawana Mutu wakwatakamisa—mutu wacho kushi mukwo shina Zambi Mukwa-Ndundo-Jeswe. Mba kuchi iye akututakamisa? Shina mahasa kukwaha utakamiso unafupu nyi?