Uhindukilo—Muukapwako Mumu Lia Ukuule

Chiwanyino cha Kwiwuluka Kufwa cha Yesu chakutukwasa tunyonge ha yiwape yize mutukatambula hamukunda wa ukuule. Uwape umwe uli uhindukilo. Kufwa hi upale wa Yehova ko. Yeyize twakuvwila chinyengo chinji nyi umwe wa mu usoko wetu kafwa. (1 Kori. 15:26) Yesu yevwa chinyengo chinji muze amwene tumbaji twenyi kanalili hakufwa cha Lazaru. (Yoa. 11:33-35) Yesu te kakwimbulula Tato. Kashika, twatamba kunyingika ngwetu ni Yehova neye kakwivwa chinyengo chinji nyi mamona tuli ni kulila kufwa cha usoko wetu. (Yoa. 14:7) Yehova kali ni usona wakuhindwisa tuvumbi twenyi waze hanafu. Kashika, ni yetu twatamba kwivwa usona.—Yombi 14:14, 15.

Muze Yehova kali Zambi mukwa-ululi, twatamba kufuliela ngwetu uhindukilo muukenda kanawa mu ululi. (1 Kori. 14:33, 40) Atu kechi kapwa ni kulila kufwa cha asoko jo, alioze makapwa ni kutambula asoko jo waze makahindwisa ku ufwe. Kutala nwakunyonga ha uhindukilo wa afu, muze nunafwisa usoko nyi? (2 Kori. 4:17, 18) Nwakusakwila Yehova hakutwaha ukuule ni kulumbununa mu Yisoneko ngwenyi afu makahinduka nyi?ee—Kolo. 3:15.

• Masepa ni asoko aka waze chipi-chipi nunashimbwila nukamone muze mukukapwa uhindukilo?

• Atu aka asoneka mu Mbimbiliya waze nunafupu nukahanjike no?