MWONO WA AKWA-KRISTU

Ambujola Sango Jipema ni Zango Lieswe

Shina wakumona ngwe chili chikalu kwambujola? Anji a kuli yetu mutuhasa kwamba ngwetu ewa. Mumu liaka? Mumu hanji keshi kututayiza mu munda, kakutuhungumiona mashimbu eswe nawa hanji twakwivwa woma wakuhanjika ni atu waze kutwanyingikine. Yuma yeswayi muyihasa kutwaha yinyengo. Alioze, twakuwayila Zambi wa uwahililo yoze unazange hanga tumulingile ni chiseke cheswe. (Samu 100:2; 1 Timo. 1:11) Yikuma yika yitatu yize muyitukwasa kuwahilila muze mutwambujola sango jipema?

Chitangu, yetu twakwambujola sango ja kutalatala. Chipwe ngwe musono atu keshi kusa ulemu unji ha kutalatala, nihindu mutuhasa kwakwasa hanga apwe ni kutalatala ha kwambulwila “sango lia kuwaha lia yuma yipema.” (Iza. 52: 7) Nawa sango jipema ja Wanangana wa Zambi mujihasa kutwaha chiseke. Kashika shimbu kanda tuchiya mu munda twatamba kupukuna ha yiwape yize Wanangana wa Zambi muukaneha hano hashi.

Chamuchaali, sango jipema twakwambujola jakukwasa atu ku mujimba ni mu ufulielo. Mumu ayo kakulilongesa kwehuka ndako ja luchisa ni kupwa ni kutalatala cha mwono wa mutolo. (Iza. 48:17, 18; Roma 1:16) Mulimo uno twakulinga wakupulula mwono wa atu. Nyi amwe malituna kutupanjika nihindu twatamba kununga ni kufupa atu waze matayiza.—Mateu 10:11-14.

Chamuchitatu, kwambujola chetu chakusolola ngwo twakulemesa Yehova. Iye kakulemesa chinji mulimo wetu wa kwambujola. (Iza. 43:10; Hepre. 6:10) Nawa Yehova ni zango lieswe kakutwaha spiritu yenyi yisandu hanga yitukwase kulinga mulimo uno. Kashika, mutuhasa kwita kuli Yehova, Zambi wa chiseke muhuko wa spiritu yisandu. (Ngala. 5:22) Ni ukwaso wenyi, mutuhasa kukumba kapalia mweswe ni kwambujola ni hamu lieswe. (Yili. 4:31) Chochene, chipwe ngwe kutuchi kuwana atu anji mu ngiza yetu waze akutayiza sango jipema, nihindu mutuhasa kuwahilila ha mulimo wetu wa kwambujola.—Eze. 3:3.

Kulisa cha mutu mu mulimo wa kwambujola—kasolo kuwahilila halipwila kanawahilila — Nyonga lika watamba kupwa nalio mu mulimo wa kwambujola? Kuchi yena muhasa kupwa ni chiseke?

TALA CHINEMA CHAKWAMBA NGWO, PWAKO NI UWAHILILO HA KULILONGESA NI KUPUKUNA, MBA NUKUMBULULE YIHULA YINO:

Mumu liaka twatamba kusa ndako yetu ya kulilongesa Mbimbiliya kulutwe, chipwe ngwe twakukalakala chinji mu munda ha tukweji eswe?
Kuchi mutuhasa kwimbulula chilweza cha Maria?
Ha mashimbu aka wakuzanga kupukuna ha Liji lia Zambi?
Yika yakukwaha uwahililo ha kwambujola sango lipema?