Uliange Kuya Ukawane ni Mukwenu—Yika Chinalumbunuka?

Achinyonga ngwe watwama mu Ngalileya ha mashimbu a Yesu. Waya ku Yerusaleme ku Chiwanyino cha Yisakila. Mu mbonge yacho himwazala too ni akwa-Kristu waze aneza ku yihela yeka ni yeka. Yena unazange kuhana chawana che kuli Yehova. Ha chino, muwanda pembe we muputuka kwenda ni kupalika mu majila muze muli atu anji hanga uye ku Tembele. Muze muheta ku tembele, muwanako mulongo usuku wa atu waze anazange kuhana milambu. Mba hi shimbu liakuhana mulambu we muliheta. Hazehene mwiwuluka ngwe, ndumbwe yoze uli mukachi ka mbunga ya atu hanji sali lieswalio kali ni mulonga ni yena. Yesu kambile yize watamba kulinga. (Tanga Mateu 5:24.) Kuchi yena ni ndumbwe munuhasa kulivwashana kulita ni usongwelo wa Yesu? Ha hita chikuma chili mushi, funjeka ha kumbululo lize lialita.

YENA WATAMBA . . .

• kuhanjika wika ni ndumbwe nyi munyingika ngwe iye kali ni chitela cha kwivwa kupihia

• kweseka kukwasa ndumbwe nyi mumona ngwe iye kakulivutula kawashi-washi hanji kakunyonga chinji ha kapalia

• kupanjika kanawa muze ndumbwe anahanjika, nawa chipwe ngwe kuwanyingikine kanawa yuma yacho, eta ukonekeno ha chize iye anevu ha yize wamulinga

NDUMBWE KATAMBA . . .

• kwita ukwaso kuli mandumbu akwo mu chikungulwila ha kwalweza yize yena wamulinga

• kukutenukina, kukulweza yuma yipi yize wamwambanga, ni kwita hanga utayize uhenge we

• kunyingika kulikehesa che ni hamu lize wasa ha kuhanjika nenyi, ni kukukonekena ni mbunge yeswe

Chipwe ngwe musono kutushi kuhana milambu ya tushitu mu uwayilo wetu, yika Yesu alongesele hakutwala ku kulita chize chili ha kulivwashana ni mandumbu jetu ni uwayilo uze Zambi akutayiza?