Kukonekena Shili Muze te Kanda Kupwa Ukuule

Jila yimuwika yize Zambi mahasa kukonekenamo shili yetu, yili kupalikila mu chitapo cha ukuule uze Yesu ahanyine ni manyinga jenyi. (Efwe. 1:7) Chipwe chocho, Mbimbiliya yakwamba ngwo: “Zambi te kanasolola uhomboloji ni kukonekena shili yize alingile kunyima, muze Yesu te kanda ahana ukuule.” (Roma 3:25) Mba kuchi Yehova te mahasa kukonekena shili shimbu kanga kupwa ukuule, aku nawa manunga ni kupwa Zambi ya ululi?

Yehova kalakenyene ngwenyi te mukupwa umwe “munyachi” uze muukula waze eswe te mafuliela muli Iye ni ku yilakenyo yenyi. Muze iye alingile chilakenyi chino, chapwile ngwe ukuule yiwapwa kulu kufweta. (Uputu. 3:15; 22:18) Zambi kapwile ni shindakenyo ngwenyi, ha shimbu lialita, Mwanenyi te malihana ha kwiza hano hashi hanga afwete ukuule. (Ngala. 4:4; Hepre. 10:7-10) Muze Yesu apwile hano hashi, Zambi yamwaha ndundo ja kukonekena shili ya atu chipwe ngwe ukuule te kanda achiuhana. Iye kachilingile mumu kanyingikine ngwenyi, chitapo chize mahana te muchifuka shili ya waze eswe afuliela.—Mateu 9:2-6.