Unachinyingika Nyi?
Mumu liaka Ndawichi apwile ni maswalale waze te hi A-Izalele ko?
HAKACHI ka tujita yilambala waze apwile mu chizavu cha maswalale a Ndawichi, hapwile Zeleke, Ka-Amone, Uriya, Ka-Hete ni Itema Ka-Moape.a (1 Sango 11:39, 41, 46) Mu chizavu chacho, mwapwile nawa maswalale waze te “A-Cherete, A-Pelete, ni A-Ngata.” (2 Samue. 15:18) A-Cherete ni A-Pelete, kota kapwile a ku vungu lia A-Filistea. (Eze. 25:16) A-Ngata kakatukile mu Ngata, yimwe mbonge ya A-Filistea.—Yoshu. 13:2, 3; 1 Samue. 6:17, 18.
Mba mumu liaka Ndawichi echele hanga yilambala jacho apwe maswalale jenyi? Kapwile ni shindakenyo ngwenyi, malunga jacho te kashishika kuli iye chahiana ulemu kuli Yehova. Ngwe chilweza, hakutwala kuli A-Kerete ni A-Pelete, umwe mukanda wakulumbununa Mbimbiliya unambe ngwo: “Ayo kanungine ni kushishika kuli Ndawichi ha mashimbu eswe waze iye apwile ni kuyula.” Kuchi ayo asolwele ushishiko wacho? Muze “malunga eswe a Izalele alitwaminyine kukaula Ndawichi ha kukaula Shipa,” A-Kerete ni A-Pelete kanungine sali lia Ndawichi ni kumukwasa kuhwisa uhulia uze Shipa aputukile. (2 Samuele 20:1, 2, 7) Ha chisuho chikwo, Adonija mwana wa Mwanangana Ndawichi kafupile kupwa mwanangana mu chihela cha Solomone. Alioze, A-Kerete ni A-Pelete kanungine ni kushishika kuli Ndawichi ni kukwasa Solomone apwe mwanangana, mumu che Yehova azangile.—1 Mia. 1:24-27, 38, 39.
Lunga mukwo hi Ka-Izalele ko yoze wanungine ni kushishika kuli Ndawichi kapwile Itaia, Ka-Ngata. Itaia ni tujita akwo 600 kakwashile Mwanangana Ndawichi muze mwanenyi Absalome alimikine nenyi ni kufupa hanga A-Izalele eswe no achilinge. Ku uputukilo, Ndawichi yalweza Itaia ngwenyi, iye katambile kulinjisa mu jita yacho mumu te hi Ka-Izalele ko. Alioze Itaia yamba ngwenyi: “Ni mwono wa Yehova, ni mwono wa yenu mwene wami mwanangana, kweswako mwene wami mapwa, hanji ha kufwa, hanji ha mwono, kwenako mungupwa yami kavumbi kenu!”—2 Samue. 15:6, 18-21.
Itaia kashishikile kuli Ndawichi, mwanangana yoze Yehova awayishile
Chipwe ngwe A-Kerete, A-Pelete ni A-Ngata kapwile yilambala, nihindu o kanyingikine ngwo, Yehova kali Zambi wamwenemwene, nawa ngwo Ndawichi kamuwayishile kuli Yehova. Pundu lume Ndawichi kanakasakwilila chinji ha kupwa ni malunga wano ashishika.
a Kulita ni shimbi yize Yehova ahanyine yili ha Shimbi Yamuchiali 23:3-6, A-Amone ni A-Moape kaakanjishile kupwa mukachi ka A-Izalele. Alioze, chinasoloka ngwe shimbi yacho te yakukanjisa wika mavungu wano ahone kuzuka ulite wa kupwa A-Izalele, te kuyishi kukanjisa yilambala wano kupwa hamwe ni atu ja Zambi hanji kutunga mukachi ko. Tala chikuma, “Casamentos com Israelitas,” ha chikuma “Amonitas” mu Estudo Perspicaz das Escrituras.