Unachinyingika Nyi?
Yika asasendote mu tembele mu Yerusaleme apwile ni kulinga ni manyinga a tushitu waze atu te akuhana ngwe yitapo?
HA MWAKA ni mwaka, asasendote mu Izalele kapwile ni kuhana tununu a tununu twa yitapo ya tushitu ha chilumbilo mu tembele. Kulita ni Josefo, umwe mukwa-kusoneka sango ku sekulu yitangu, atu kapwile ni kuhana mapanga kuhiana 250,000 ngwe yitapo hanga aashihe ha Chizomboka. Kashika, kwapwile manyinga anji a tushitu. (Levi 1:10, 11; Kwa. 28:16, 19) Manyinga jacho kuli te akuya?
Muze akwa-kuvumbula yuma yikulu afulile ha chihela haze hapwile tembele yize Heronde atungile ha mashimbu ja Yesu, kawanyineho umwe kapila muze mwapwile ni kunjila manyinga jacho.
Tutalenu yikuma yaali hakutwala ku kapila wacho, yize te yakukwasa chilumbilo chihone kupwa ni majilo:
Yituwa ha chilumbilo: Maliji amwe waze anasolola yituwa yapwile ha chilumbilo kaawanyine ha Mishná, umwe mukanda ukulu uze wakuhanjika ha mianda ni shimbi ja A-Yunda uze asonekene hanyima lia mwaka 200. Mukanda wacho unambe ngwo: “Ku sali lia chitokelo kwapwile yituwa yaali . . . manyinga waze apwile ni kumwanginyina ku chitokelo ni ku sule, kapwile ni kushindumukina mu chituwa chacho hanga alichinge ni meya waze te akukosa no ha chilumbilo, ni kuya mu chitwetwe cha Kendrone.”
Akwa-kuvumbula yuma ya ku shakulu kakutayiza ngwo, ha chilumbilo hapwile yituwa muze mwapwile ni kushindumukina manyinga a tushitu jacho. Umwe mukanda wa sango ja A-Yunda, wakulumbununa ngwo, akwa-kuvumbula yuma ya ku shakulu kawanyine tupila hakamwihi ni tembele muze kota apwile ni kumwangina manyinga a tushitu ni meya waze apwile ni kukosa no ha chilumbilo.
Unji wa meya: Mba chilumbilo ni kapila muze mwapwile ni kushindumukina manyinga yipwe yalinanga, asasendote kapwile ni kufupa meya anji. Meya waze apwile kukosa no yihela yacho, kapwile ni kwakoka mukachi ka mbonge kupalikila ku milonda, mashima ni majila akwo nawa. Joseph Patrich, mukwa-kuvumbula yuma yikulu, kambile ngwenyi: “Kota kukushi niyimwe tembele yikwo ya ha mashimbu jacho, yize yapwile ni kukoka meya apema ni kumwanga meya api kupalikila mu kapila.