Chilweza chika unazange hanga ana je akaule?
KULI YISEMI
8 Chilweza
YIKA CHINO CHINALUMBUNUKA?
Yisemi waze apwa yilweza yipema, kakulinga yuma yize akulongesa kuli ana jo. Kanda unyonga ngwe mwane mahanjika umwenemwene nyi kuwazangile kuhanjika ni mutu yoze uli ku chikolo mba makwivwa mwamba ngwe: “Mulweze ngwe chishiko.”
Atu anji kakwamba ngwo: “linga yize nakuhanjika hi yize ko nakulinga. Alioze chino kuchishi kulingiwa kuli twanuke. O kakuzanga kwimbulula yuma yeswe yize twakulinga. Kashika nyi twalongesa chuma chimwe mba matumona tunalingi chuma cheka, o mahasa kututoweza.”—David.
CHIYULO CHA MU MBIMBILIYA: “Mutu kanda akeya, yena mwene wakwiya, nyi?”—A-Roma 2:21.
MUMU LIAKA CHINO CHILI CHILEMU?
Chipwe waze akulilongesa ni ana jetu ku ma shikola kechi kuhasa kwalumuna yitanga yo ngwe chize yisemi akulinga. Kashika, yetu yisemi nuli e twatela kulianga kulongesa ana jetu kulinga yuma yalita. Hachino, chili chipema chinji kusolola mu yitanga yuma yize twakulongesa.
“Mutuhasa kuhanjika yisuho yinji ni ana jetu hakutwala ku chuma chimuwika chakuhona kunyingika nyi kanatupanjika lume nyi ka. Alioze nyi twahona kulinga yuma yize twakulongesa, o matutoweza. Twanuke kakumona yuma yeswe yize twakulinga, chipwe muze tunanyongo ngwetu keshi kutumona.”—Nicole.
CHIYULO CHA MU MBIMBILIYA: “Mana a kwilu . . . keshi ulembekese.”—Tiangu 3:17.
YIZE MUHASA KULINGA
Nyonga ha yitanga yipema yize muyikukwasa ku mwono. Programa yika hanji yinema yize wakuzanga kutala? Kuchi wakutwama ni asoko? Masepa a mulali uka ukwete? Shina wakulihulumba hali akwenu? Kashika, watamba kulihula ngwe: Shina nguli mutu yoze mwanami atamba kwimbulula?
“Ami ni mukwetu lunga tushi kushinjila ana jetu atwame kulita ni shimbi jize twakukaula.”—Christine.
Nakwita ukonekeno muze nakuhengesa. Ana jenu kananyingika ngwo nuli yihenge. Nyi nwaputuka kwita ukonekeno kuli asoko jenu muze munulinga chuma chipi, munusolola chilweza chipema cha kulikehesa ni kupwa mutu mupema.
“Muze mutulinga chuma chipi, twatamba kwita ukonekeno hanga ana jetu ejilile kwivwa liji liacho. Mumu nyi twachilingile, o maputuka kusweka upi wo.”—Robin.
“Etu yisemi e mutuhasa kwalumuna yitanga ya ana jetu kuhiana mutu mweswawo. Kashika twatamba kupwa yilweza yipema, mumu mashimbu eswe, ana jetu kakumona yuma yeswe yize twakulinga. Mwono wetu wapwa ngwe umwe mukanda uze uli wa washi ni limwe longeso lize tunalongesa mashimbu eswe.”—Wendell.