Kulihumikiza Chakuyukisa

YIKA KULIHUMIKIZA CHINALUMBUNUKA?

Kulihumikiza chinachingi

• kulilongesa kushimbwila

• kulihumikiza muze unashimbwila yimwe

• kuhwisa milimo yize akukwaha

• kuvumbika akwenu

MUMU LIAKA KULIHUMIKIZA CHILI CHILEMU?

Ana waze akulihumikiza kakuhasa kwehuka yeseko, chipwe ngwe kulinga chino muchifupiwa kwecha yimwe. Ana waze keshi kulihumikiza mahasa

• kulilamba ni akwo

• kupinda ni manyonga

• kunwa makanya, kunwa chinji walwa ni kushipa makanya asasu

• kuhona kulia kanawa

Kulita ni yize akwa-mana akwamba, ana waze akulihumikiza chakupwa chashi kuli ayo kupwa makulwana waze keshi kuyiza chinji, waze keshi kuhona chinji mbongo ni kuhona kulinga yuma yize yakulimika ni shimbi ja nguvulu. Chino chatwalile longeshi Angela Duckworth wa Universidade da Pensilvânia, kupwa ni nyonga lino: “Kupwa chihumikiji chili chipema.”

CHIZE MUHASA KULONGESA ANA JE KUPWA YIHUMIKIJI

Lilongese kulituna ni kununga ni nyonga lie.

SHIMBI YA MBIMBILIYA: “Echenu hanga liji lienu ‘Ewa’ lilumbunuke ‘ewa,’ ‘Ka,’ ka.”—Mateu 5:37.

Muze yisemi akwamba ngwo “ka,” ana kanji-kanji kakulinga mbwanja, chipwe mukachi ka atu. Nyi yisemi malinga yize ana anazange, ana mamona ngwo kuneha mbwanja yili jila yipema yakuhasa kutambula yize anazange.

Alioze, nyi chisemi mamba ngwenyi ka, ana manyingika umwenemwene uno: Hi mashimbu eswe ko twakuhasa kupwa ni yuma yize tunazange. Dr. David Walsh kasonekene ngwenyi: “Chili chilemu kunyingika ngwo, atu waze ananyingika umwenemwene uno kakuwahilila. Nyi twalongesa ana jetu ngwo ayo matambula yeswe yize anazange, kwamba umwenemwene kulinga chino hi kwakwasa ko.”

Kwamba ka kuli ana je chize mu wanuke wo, muchaakwasa kulutwe hanga ayo alitune makanya asasu, utanji hanji yuma yikwo yipi.

Longesa ana je anyingike ngwo yuma yize o akulinga, muyihasa kwayukisa hanji ka.

SHIMBI YA MBIMBILIYA: “Cheswacho mutu makuwa, chenacho makacha nawa.”—A-Ngalashia 6:7.

Mwane katamba kunyingika ngwenyi, yuma yize iye akulinga muyihasa kumunehena lamba. Ngwe chilweza, nyi mwane keshi kuhasa kulihumikiza muze anapihilila, niumwe mazanga kupwa sepa lienyi wakuhi. Alioze, nyi malilongesa kulihumikiza ni kwecha akwo muze anahanjika kuhwisa nyonga lio chakuhona kwateta-teta maliji, atu mazanga kukundama kuli iye. Kwasa mwane kunyingika ngwo mwono wenyi muupwa washi nyi mapwa mukwa-kulihumikiza.

Kwasa ana je alihulikile ha yuma yize yahiana ulemu.

SHIMBI YA MBIMBILIYA: “Nukasele shindakenyo ha yuma yahiana kupema.”—A-Fwilipu 1:10.

Kulihumikiza kuchalumbunukine wika kwecha kulinga yuma yipi. Chinalumbunuka nawa kulinga yuma yize yinalite chipwe ngwe yili yiikalu chinji kuyilinga. Chili chilemu mwane kusa yuma yilemu ha chihela chitangu. Ngwe chilweza, iye katamba kulinga milimo ya ku shikola shimbu kanda achiya ni kuheha.

Pwako chilweza chipema.

SHIMBI YA MBIMBILIYA: “Mumu hinanwaha chilweza, hanga ni yenu nawa chanutamba kulinga chizechene ngwe yami hinalinga kuli yenu.”—Yoano 13:15.

Muze unapalika mu umwe kapinda, hanji mu yimwe yuma yize muyihasa kukuvwisa kupiha hanji kukupikalisa, solola kuli mwane yize mulinga. Yuma yize mulinga, muyipwa chilweza kuli mwane hakutwala ku chize kulihumikiza chakuneha yiwape. Ngwe chilweza, muze mwane akulinga yize kuyalitele, shina wakulihumikiza nyi wakumukumbulula ni uli?