YIZE MUYIKUKWASA MUZE NDANDO YA YUMA MUYINYINA

Shimbwila Ngwe Yuma Muyikapema

Shina mu chifuchi chenu ndando ya yuma yinayi ni kunyina chinji, alioze falanga jize wakutambula jili jikehe? Shina unalipikala chinji ha chize mulifunga ni chize mufunga usoko we? Nyi chenacho, muhasa kunyonga ngwe yuma kuyichi keza kapema. Chipwe ngwe tunapalika mu yuma yikalu, nihindu chili chilemu kupwa ni nyonga lialita ni kushimbwila ngwetu, yuma muyalumuka kulutwe lia matangwa.

TAYIZA NGWE YUMA YALUMUKA

Atu waze akwete nyonga lialita ni kushimbwila ngwo yuma muyalumuka, keshi kushimbwila wika yuma yipema ku mwono wo. Kunyingika ngwo yuma muyihasa kwalumuka, chakukwasa atu awahilile ni yize ali nayo. Ngwe chilweza, akwa-kuhengwola hanamona ngwo, atu waze akwete nyonga lialita . . .

kakunyongonona
kakwijilila ni yuma muze muyalumuka ku mwono wo
kakukwata yiyulo yize yakwakwasa kupwa kanawa ku mujimba

YIZE MUHASA KULINGA

Chitangu, hengwola umone chize Mbimbiliya muyihasa kukukwasa. Mu Mbimbiliya, muli yiyulo yize muyihasa kukukwasa muze ndando ya yuma muyoka. Yiyulo yacho, muyikukwasa kumona chize musongwela mwono we ni kulilulieka hanga ukumbe yipikalo yize muyiza kulutwe.

“Mana ni malinjekela makufunga.”—Yishima 2:11.

Chamuchiali, hengwola yize Mbimbiliya yakwamba hakutwala ku yuma ya kulutwe. Kunyingika ulemu wa mana waze ali mu Mbimbiliya, muchikukwasa kulihulikila chinji ku yuma ya kulutwe lia matangwa. Ngwe chilweza, kuuchi kulilongesa wika ngwe, Zambi kanazange hanga upwe ni kutalatala cha kulutwe lia matangwa, alioze nawa upwe ni shindakenyo ha kutalatala chacho. (Jeremia 29:11) Shindakenyo yacho, yili Wanangana wa Zambi.

WANANGANA WA ZAMBI YIKA, NAWA YIKA MUUKALINGA?

Wanangana wa Zambi uli umwe unguvulu mu malilu, uze muukayula hashi. (Daniele 2:44; Mateu 6:10) Ha mashimbu jacho, niumwe makamona lamba hanji kupwa chiswale wakuhi. Atu eswe makapwa ni sambukila ni yuma yize makafupa hanga awahilile. Ngwe chize yisoneko yino yinasolola:

“Kumukawaha, kumuchikapwa kanawa ni yena.”—Samu 128:2.

[Atu waze makapwa mu Wanangana wacho] “kechi kahondangana mokomoko.”—Izaia 65:23.

“Kumukukapwa kulumbama cha mbuto mu mavu.”—Samu 72:16.

Atu anji kakufuliela ha yilakenyo yacho, mumu kakwete shindakenyo ngwo “Zambi keshi mahuza.” (Titu 1:2) Nyi muchilita, tanga Mbimbiliya ni kulilongesayo. Kutalatala muchikukwasa kunyongonona ha mashimbu akalu ni kupwa ni shindakenyo ngwe, yuma muyikapema kulutwe lia matangwa.