Ndina Kali mu Kapinda

YENA unamono Ndina aya waze iye anayi ni kumeneka? Iye kanayi ni kumeneka amwe ana-mapwo waze atwama mu chifuchi cha A-Kanana. Shina chino tato Yakomba machizanga? Mba uhase kukumbulula chihula chino, euluka yize te Apalahama ni Izake akunyonga hakutwala kuli ana-mapwo a mu Kanana.

Shina Apalahama te kakuzanga ngwo mwanenyi Izake ambate umwe mwana-pwo wa mu Kanana? Ka, iye te keshi kuchizanga. Chikwo nawa, shina Izake ni Rebeka te kakuzanga ngwo mwano Yakomba ambate umwe mwana-pwo wa mu Kanana? Ka, ni ayo te keshi kuchizanga. Yena unanyingika mumu liaka?

Mumu atu a mu Kanana te kakuwayila tuzambi a mahuza. Ayo te hi atu ko apema a kulimbata noo, hanji chipwe kulinga noo usepa. Kashika mutuhasa kupwa ni ushindakenyo ngwo Yakomba te keshi kuwahilila ha usepa uze mwanenyi alingile ni ana-mapwo a mu Kanana.

Ndina yapwa mu kapinda. Yena unamono ha chizulie lunga wa A-Kanana yoze unatale kuli Ndina? Jina lienyi Shekeme. Limwe tangwa muze Ndina ayile ni kwameneka, Shekeme yakwata Ndina yamushinjila hanga alimbombe nenyi. Chino te chipi chinji, mumu waze hanalimbata e mahasa kulipomba wika. Upi uno Shekeme alingile kuli Ndina unakaneha kapinda munji.

Muze mandumbu ja Ndina evwile upi wacho, ayo yevwa uli unji. Aali a kuli ayo, Simeone ni Levi, yevwa uli unji, yanda njangu yaya mu mbonge yatungumuna malunga jacho. Ayo ni mandumbu jo akwo yashaha Shekeme ni malunga eswe akwo. Tato Yakomba yevwva uli unji mumu ana jenyi kanakalinga upi unji.

Kuchi kapinda wacho anakaputuka? Kanakaputuka mumu Ndina kanakalinga usepa ni atu waze te keshi kwononokena shimbi ja Zambi. Yetwe twazangile kupwa ni masepa jacho, nyi ngwami?