Yoshua Hapwa Kasongwelo

MOSE yazanga kuya ni A-Izalele mu Kanana. Kashika iye yeta ngwenyi: ‘Yehova, ngweche kama nguzauke Lwiji Yordau, hanga ngutale chifuchi chipema.’ Alioze Yehova yamba ngwenyi: ‘Kwahwa! Kanda wamba nawa yuma yino!’ Yena unanyigika mumu liaka Yehova ambile chocho?

Mumu ha yize yapwile ha mashimbu waze Mose alambile ku liwe. Euluka ngwo, iye ni Arone kakachichimiekene Yehova. Ayo kakambile kuli atu ngwo Yehova mwe waaha meya waze atuhukile ku liwe. Kashika ha mukunda wa yuma yacho Yehova yamba kuli iye ngwo kechi kusongwela nawa a A-Izalele ha kunjila mu Kanana.

Ha kupalika cha amwe tukweji muze Arone te hafwa, Yehova yamba kuli Mose ngwenyi: ‘Kwata Yoshua hanga umuse kulutwe lia Eleazare mwe sasendote ni kumeso ja atu. Kumeso ja mbunga, mwamba kuli eswe ngwo Yoshua mwe kasongwelo mwaha.’ Mose yalinga yeswe yize Zambi amulwezele ngwe chize yena unamono ha chizulie chino.

Mba hi Yehova yamba kuli Yoshua ngwenyi: ‘Pwako ni tachi, kanda wivwa woma. Yena mukasongwela A-Izalele hanga anjile mu chifuchi cha Kanana ngwe chize hingunalakenya, nawa Yami mungukapwa hamwe ni yena.’

Mba hi Yehova yamba kuli Mose hanga anyine helu lia mulundu wa Nebo mu chifuchi cha Moape. Kuzekwene Mose yahasa kumona Lwiji Yordau ni chifuchi chipema cha Kanana. Yehova yamulweza ngwenyi: ‘Chino che chifuchi chize yami ngunakalakenya kuhana kuli ana ja Apalahama, ja Izake ni ja Yakomba. Nakwecha hanga uchitale, alioze uchikunjilamo.’

Mose kanakafwila kuzekwene ku mulundu wa Nebo. Te kali ni 120 a miaka. Iye te uchili ni tachi jinji mu mujimba, nawa meso jenyi te achili angunu. Atu yapwa ni yinyengo yinji nawa yalila ha kufwa cha Mose. Alioze ayo yawahilila hakupwa ni Yoshua ngwe kasongwelo mwaha.