Zambi Yasakula Ndawichi

YENA unamono yize yapwako? Mukweze au kalamwina mwana panga kukanwa lia ursu. Ursu kakwata mwana-panga hanga amulie. Alioze mukweze au kazombwesa ursu, kashika alamwina mwana-panga ku kanwa lia ursu. Muze te ursu hazunduka, mukweze au yamumona, mba yamushaha! Tangwa likwo yalamwina umwe panga ku kanwa lia ndumba. Mukweze au chitakame, nyi ngwami? Yena unanyingika iye iya?

Mukweze yono jina lienyi Ndawichi. Te katwama mu mbonge ya Mbeteleme. Kako te Opete, mwana wa Rute ni Mboaze. Yena uneuluka atu jacho? Nawa tato ya Ndawichi te Yese. Ndawichi te kakufunga mapanga ja tato. Ndawichi kasemukine muze te hikwapalika 10 lia miaka chize muze Yehova asakwile Saulu hanga apwe mwanangana.

Limwe tangwa Yehova yamba kuli Samuele ngwenyi: ‘Anda yimwe ndambu ya maji apema nawa yako ku zuwo lia Yese, ku Mbeteleme. Yami hinasakula umwe wa kuli ana jenyi hanga apwe mwanangana.’ Muze Samuele hamona mwana wa mukulwana wa Yese, Eliape, iye yamba ngwenyi: ‘Mwenau kota Yehova asakula.’ Alioze Yehova yamba kuli iye ngwenyi: ‘Kanda utala ku meso jenyi, hanji ku chizundamo chenyi. Yami chasakwile iye hanga apwe mwanangana.’

Mba Yese yasanyika mwanenyi Abinadambe hanga eze kuli Samuele. Alioze Samuele yamba ngwenyi: ‘Ka, chipwe yono Yehova kamusakwile.’ Hi Yese yaneha nawa mwanenyi Shama. Samuele yamba nawa ngwenyi: ‘Ka, chipwe yono Yehova kamusakwile.’ Yese yaneha ana jenyi a malunga shimbiali kuli Samuele, alioze Yehova kakasakwile niumwe wa kuli ayo. Samuele yahula ngwenyi: ‘Ana je eswe wa ene nyi?’

Yese yamba ngwenyi: ‘Kwasala mwe kasulasongo. Alioze kanafungu mapanga.’ Muze Ndawichi hamuneha, Samuele yamona ngwo kanuke wacho te mupema chinji. Yehova yamba ngwenyi: ‘Mwenau. Sako maji hali iye.’ Samuele yalinga chocho. Hi kulutwe lia matangwa, Ndawichi yapwa mwanangana wa Izalele.