Ayo Kakafulamanyine

YENA uneuluka hakutwala kuli akweze awa atatu? Chochene, ayo kali masepa atatu ja Daniele, waze anakalituna kulia chize te chisokupema kuli ayo. A-Babilonia yaaluka majina ngwo Shadrake, Meshake ni Abedenego. Alioze, atale haliapwila. Mumu liaka ayo kasokufulamana, ngwe chize analinga atu akwo, ku lukaponya alu? Tutalenu.

Yena uneuluka shimbi jize Yehova asonekene anavuluka ngwo Kumi lia Shimbi? Shimbi yitangu te yakwamba ngwo: ‘Kanda nuwayila tuzambi eka, shina wika yami. Akweze wano ayo kanakaula shimbi yacho, chipwe ngwe te hi chashiko.

Nabukanezore, mwanangana wa Babilonia, yakunga atu anji alemu hanga awayile lukaponya luze iye amikine. Yamba kuli atu eswe ngwenyi: ‘Muze munwivwa zungo lia yitavwi, ni lundembo ni milali yikwo ya yisaji, yenwe chanutamba kufulamana ni kuwayila lukaponya luno lwa oru. Mweswawo kafulamanyine ni kuwayila, mamukonga hazehene mu lutengo wa kahia.’

Muze Nabukanezore hevwa ngwo Shadrake, Meshake ni Abedenego kasokufulamana, iye yevwa uli unji. Yatuma kwaasaka. Iye yeeseka nawa kamuchiali hanga afulamane. Alioze, akweze jacho te kakujikijila kuli Yehova. Ayo yamba kuli Nabukanazore ngwo: ‘Zambi yetu yoze twakulingila mahasa kutupulwila. Alioze, chipwe ngwe iye kechi kutupulwila, yetwe tuchi kufulamana ku lukaponya lwe lwa oru.’

Muze hevwa chocho, Nabukanezore yevwa nawa uli unji. Te kuli umwe lutengo wa kahia, mba iye yatuma ngwo: ‘Wezelenu kahia mu lutengo yisuho shimbiali!’ Hohene iye yatuma amwe maswalale jenyi a tachi jinji hanga akase Shadrake, Meshake ni Abedenego mba aakonge mu lutengo wa kahia. Lutengo wacho te kanasasaminya chinji, kashika mulengi wa kahia yiushaha malunga jacho a tachi jinji. Alioze yika yinakapwa kuli akweze atatu waze ayo anakakonga mu lutengo wa kahia?

Mwanangana yanonoka muchima lia lutengo wa kahia, nawa yevwa woma unji. Iye yahula ngwenyi: ‘Ngwami malunga atatu twakasanga mba yitwakonga mu lutengo wa kahia?’

Tuvumbi twenyi yakumbulula ngwo, ‘Ewa, che twalinganga.

Iye yamba ngwenyi: ‘Alioze yami ngunamono malunga awana alimo, kanende muchima lia kahia. Ayo kali akukasulula nawa kaso kuwema. Nawa wamuchiwana kanalifwa ni umwe zambi.’ Mwanangana yakundama ku lutengo wa kahia, mba yasanyika ngwenyi: ‘Shadrake! Meshake! Abedenego! Tuvumbi twa Zambi Chitunda, tuhukenu, nwize kuno!’

Muze ayo hijatuhuka, atu eswe yamona ngwo ayo kawemene. Kashika, mwanangana yamba ngwenyi: ‘Zambi ya Shadrake, Meshake ni Abedenego afumane! Iye katuma mungelo wenyi hanga aalamwine, mumu ayo kafulamanyine chipwe kuwayila umwe zambi mweka, shina wika Zambi yo.’

Chino hi chilweza chipema ko cha ufulielo kuli Yehova chize yetwe chatutamba kwimbulula?