Daniele mu Wina wa Ndumba

TALA kama! Daniele kali mu utoji. Alioze ndumba kaso kumulia. Yena unanyingika mumu liaka? Iya wasa Daniele mu wina au uli ni ndumba anji chize? Tutalenu.

Mwanangana wa Babilonia te umwe lunga yoze anavuluka ngwo Dariu. Iye yazanga chinji Daniele, mumu iye te chimbovu nawa mukwa mana. Dariu yasakula Daniele yamusa ngwe mwata mu chiyulo cha wanangana wenyi. Alioze, malunga akwo a mu wanangana yevwila Daniele chipululu, kashika ayo yalinga chimwe chuma.

Ayo yaya kuli Dariu yamba ngwo: ‘Mwanangana, Yetwe hitwanyonga chino, chanutamba kusa yimwe shimbi yize muyamba ngwo ha matangwa 30 niumwe kanda alemba kuli umwe zambi hanji kuli umwe mutu, shina wika kuli yena mwanangana. Alioze mweswawo mayehuka, chatamba kumunyasa mu wina wa ndumba.’ Dariu te kaso kunyingika mumu liaka malunga jacho anazange kusa shimbi yacho. Alioze, iye yanyonga ngwo chiyulo chacho chili chipema, kashika iye yatuma kusoneka shimbi yacho. Mba hi te shimbi yacho kechi kuhasa kuyalumuna nawa.

Muze Daniele hanyingika hakutwala ku shimbi yacho, iye yaya ku zuwo nawa yalemba, ngwe chizechene te akulinga. Atu jacho api te kananyingika ngwo Daniele kechi kwecha kulemba kuli Yehova. Ayo yawahilila chinji, mumu yamona ngwo manyonga jo akuchiza Daniele ha milimo wenyi halingiwa.

Muze mwanangana Dariu hanyingika mumu liaka malunga wano te anazange shimbi yacho, iye yanyenganyana chinji. Alioze iye te kechi kuhasa kwalumuna shimbi yacho, kashika iye yatuma hanga anyase Daniele mu wina wa ndumba. Hohene mwanangana yamba kuli Daniele ngwenyi: ‘Yami ngunafuliela ngwo Zambi ye, yoze yena wakulingila, makulamwina.’

Dariu yapwa ni yipikalo yinji kashika ha ufuku iye kakahashile kuya tulo. Ha chimene iye yazomboka ndo ku wina wa ndumba. Yena muhasa kumumona ha chizulie. Iye yatambika ni liji linene ngwenyi: ‘Daniele, kavumbi ka Zambi wa mwono! Zambi ye yoze wakulingila hahasa kukulamwina kuli ndumba?’

Daniele yakumbulula ngwenyi: ‘Zambi katuma mungelo wenyi, nawa kayika makanwa ja ndumba, kashika ayo kangulile.’

Mwanangana yawahilila chinji. Iye yatuma kuchiza Daniele mu wina. Mba, hi mwanangana yatuma kuneha malunga api waze anakaliongela Daniele hanga aanyase mu wina wa ndumba. Shimbu kanda achiheta ha mashima ja wina, yaakwata kuli ndumba ni kwapalwola yifwaha yo yeswe.

Mba mwanangana Dariu yatuma mukanda kuli atu eswe a mu wanangana wenyi ngwenyi: ‘Yami ngunase shimbi ngwami atu eswe chatamba kuvwila woma Zambi ya Daniele. Iye kalinga yikomokeso yinene. Iye kalamwina Daniele ku makanwa ja ndumba.’