Yesu Kanafuna mu Malilu

HA KUPALIKA cha matangwa, Yesu yasoloka kuli tumbaji twenyi ha yisuho yinji. Ha chisuho chimwe kanakamumona kuli amwe 500 a tumbaji. Muze iye asolokele kuli ayo, yena unanyingika yize Yesu alwezele? Wanangana wa Zambi. Yehova kanakatuma Yesu hano hashi hanga alongese hakutwala ku Wanangana wacho. Nawa iye yanunga nikuchilinga chipwe muze te hamuhindwisa mu ufwe.

Yena uneuluka Wanangana wa Zambi yika? Ewa, Wanangana uli umwe unguvulu wamwenemwene wa Zambi mu malilu, nawa Zambi hanasakula Yesu hanga apwe mwanangana. Ngwechize twalilongesa kulu, Yesu kanakasolola chize iye makapwa umwe mwanangana mupema, ha kulisa akwa zala, ha kuwuka mieji ni ha kuhindwisa afu ni mwono!

Muze Yesu makayula ngwe mwanangana ha kanunu umuwika wa miaka mu malilu, hano hashi kuchi muhakapwa? Ewa, hashi heswe muhakapwa paraisu yipema. Hechi kapwa nawa jita, utoji, yikola chipwe kufwa, ka. Yetwe tunanyingika umwenemwene wacho, mumu Zambi kalingile hashi hanga hapwe paraisu atu a twameho. Kashika ha uputukilo iye yalinga munda wa Endene. Nawa Yesu makafunga ngwo yuma yeswe yize Zambi anazange kulinga hanga yilingiwe.

Mashimbu yaheta hanga Yesu afune kwenyi mu malilu. Yesu kanakasoloka kuli tumbaji twenyi ha 40 a matangwa. Kashika ayo anakapwa ni ushindakenyo weswe ngwo, Yesu kahinduka mu ufwe. Muze te kanda achiya iye yamba kuli tumbaji twenyi ngwenyi: ‘Twamenu mu Yerusaleme ndo muze yenwe munukatambula spiritu musandu.’ Spiritu musandu yili tachi ja Zambi, yapwa ngwe fuji yize yakupekula, nawa te muyikwasa tumbaji hanga alinge upale wa Zambi. Hi kusuloho, Yesu yamba ngwenyi: ‘Yenwe chanutamba kwambujola hakutwala kuli yami ndo ku masongo a hashi.’

Muze te Yesu hamba chocho, yikupwa chimwe chikomokeso. Iye yaputuka kuzezuka mu malilu ngwe chize yena unamono ha chizulie. Hazehene limwe lelwa yilimufuka, hi tumbaji kamwene nawa Yesu. Yesu yaya mu malilu, nawa momwene iye yaputuka kuyula tumbaji twenyi hano hashi.