Eshetevau Kanamwasa Mawe

LUNGA unase makungunwa hashi jina lienyi Eshetevau. Iye kali umwe kambaji washishika wa Yesu. Alioze tala yize anamulinga haliapwila! Malunga wano kanamwase mawe anene-anene. Mumu liaka ayo anevwila Eshetevau kole, ni kulinga chuma chipi chize? Tutalenu.

Zambi kanakakwasa Eshetevau ha kulinga yikomokeso yilemu. Malunga jacho kakachizangile, kashika ayo yamuzwelesa ha mukunda wa kulongesa umwenemwene kuli atu. Alioze Zambi yahana malinjiekela kuli Eshetevau, nawa Eshetevau yasolola kuli malunga jacho ngwo ayo te kanalongesa yuma ya mahuza. Ha yino ayo yevwa uli unji. Kashika ayo yamukwata, nawa yasanyika atu hanga ahanjike mahuza hali iye.

Sasendote wa Lutwe yahula Eshetevau ngwenyi: ‘Yuma yino yili yamwenemwene?’ Eshetevau yamukumbulula ha kulinga chimwe chiyulo chipema cha mu Mbimbiliya. Iye yanunga ni kwamba hakutwala kuli malunga api waze te akuvwila aprofeta a Yehova kole ha mashimbu anji a kunyima. Nawa iye yamba kuli ayo ngwenyi: ‘Ni yenwe nuli ngwe malunga jacho. Nunakashaha Yesu kavumbi wa Zambi, nawa yenwe kunushi kwononokena shimbi ja Zambi.’

Yuma yino yineha uli unji kuli mangana a ulembelo! Ayo yakeleketa ku mazo jo ha mukunda wa uli wo. Alioze Eshetevau yahetula mutwe wenyi, nawa yamba ngwenyi: ‘Talenu! Yami ngunamono Yesu kanamane ku chindume cha Zambi mu malilu.’ Ha chino, malunga jacho yayika matwi jo ni moko, nawa yaya ndo kuli Eshetevau. Ayo yamukwata yatuhuka nenyi haze lia mbonge.

Hohene ayo yazula mahina jo yaahana kuli mukweze wa lunga Saulu hanga iye afunge. Yena unamono Saulu? Hohene amwe a kuli malunga jacho yaputuka kwasa Eshetevau mawe. Eshetevau yasa makungunwa jenyi hashi, ngwe chize yena unamono, nawa iye yalemba kuli Zambi ngwenyi: ‘Yehova kanda watwika mulonga uno.’ Iye te kananyingika ngwo amwe a kuli ayo kanakaashinjila kuli mangana a ulembelo. Hohene Eshetevau yafwa.

Nyi umwe mutu makulinga upi, shina ni yena mumulinga upi, hanji kwita kuli Zambi hanga amumwese lamba? Eshetevau ni Yesu ayo kakalingile chocho. Ayo kanakapwa yimbovu kuli waze anakamwesa lamba. Tukaulenu chilweza cho.