Yena Wakwivwa Woma Ngwe Uli Ukawe?

Tala kanuke au uli ha chizulie. Iye kali ngwe kanevu woma nawa ngwe kali ukawenyi, nyi ngwami? Shina ni yena che wakwivwa ha mashimbu akwo?— Atu anji ha mashimbu akwo che akwivwa. Mbimbiliya yinambe hakutwala kuli masepa ja Yehova waze te ni ayo akwivwa woma ngwe kali ukawo. Umwe wa kuli ayo te Eliya. Tulilongesenu hakutwala kuli iye.

Eliya te katwama mu chifuchi cha Izalele mashimbu anji kunyima, muze Yesu te kanda achisemuka. Ahabe, mwanangana wa mu Izalele, te keshi kuwayila Zambi wamwenemwene, Yehova. Ahabe ni mukwo-pwo Jezebele, te kakuwayila zambi wa mahuza Mbale. Kashika atu anji mu Izalele noo yaputuka kuwayila Mbale. Mwazovu Jezebele te mutu mupi chinji kashika iye azangile kushaha atu eswe waze te akuwayila Yehova hamwe ni Eliya! Yena unanyingika yize Eliya alingile?—

Eliya kachinyine! Iye kayile mu puya ni kuswama ku chimwe chivwenge. Yena unanyingika mumu liaka iye achinyine?— Mumu te woma anevu. Alioze Eliya te chamutambile kwivwa woma. Mumu liaka? Mumu iye te kananyingika ngwo Yehova mahasa kumukwasa. Yehova te hanasolola ndundo jenyi kuli Eliya. Ha amwe mashimbu kunyima, Yehova kakumbulwile yilemba ya Eliya hakuholola kahia mu malilu. Kashika, Yehova te mahasa kukwasa nawa Eliya!

Mashimbu waze Eliya apwile mu chivwenge, Yehova yahanjika nenyi nawa yamuhula ngwo: ‘Yika yena unalinga kuno?’ Eliya yakumbulula ngwenyi: ‘Yami wika nasala ni kukuwayila. Nguli ukawami, nawa ngunevu woma wakungushaha.’ Eliya yanyonga ngwe akwa kuwayila Yehova eswe te haashaha. Alioze Yehova yamba kuli Eliya ngwenyi: ‘Ka, hi chamwenemwene ko. Kuli 7,000 a atu akwo waze ananguwayila. Pwako ni hamu. Yami nguli ni milimo yinji hanga uyilinge!’ Shina Eliya kanakevwa chiseke ha kwivwa maliji wano?—

Yika muhasa kulilongesa ha yize yapwile kuli Eliya?— Kanda upwa ni kwivwa woma ngwe ukawe uli. Yena uli ni amwe masepa waze akuzanga Yehova nawa akukuzanga. Chikwo nawa Yehova kakwete ndundo jinji, iye manunga ni kukukwasa! Shina yena unawahilila ha kunyingika ngwo ushi ukawe?—