Yesu te Kakwononoka Mashimbu Eswe

Shina chili chashi kwononokena yisemi je mashimbu eswe?— Ha mashimbu akwo muchihasa kupwa chikalu kwononoka. Yena unanyingika ngwo Yesu te kakwononokena Yehova ni yisemi jenyi?— Chilweza chenyi muchihasa kukukwasa hanga wononokene yisemi je chipwe ngwe muchipwa chikalu. Tulilongesenu hakutwala ku chilweza chacho.

Muze Yesu te kanda achiza hano hashi, iye te katwama mu malilu ni Tato, Yehova. Alioze Yesu kapwile nawa nyi yisemi hano hashi. Majina jo te Yosefwe ni Maria. Yena unanyingika chize chapwile mba ayo apwe yisemi ja Yesu?—

Yehova yatutulula mwono wa Yesu mu malilu yausa mu jimo lia Maria, mba Yesu yasemuka hano hashi. Chino chapwile chikomokeso! Yesu yaputuka kukola mu jimo lia Maria, ngwe chizechene ana-kemba eswe akukola mu majimo ja anaye. Ha kupalika cha tukweji livwa, Yesu yasemuka. Chenacho chapwile mba Maria ni mukwo-lunga, Yosefwe apwe yisemi ja Yesu a hano hashi.

Muze Yesu akumbanyishine miaka 12, iye yalinga chimwe chuma chize chasolwele ngwo iye te kakuzanga chinji Tato, Yehova. Chino chapwile muze Yesu ni usoko wenyi alingile wenyi usuku wa kuya ku Yerusaleme ha Chizomboka. Muze te anafuna ku zuwo, Yosefwe ni Maria te kaso kunyingika kuze Yesu te ali. Yena unanyingika kuze Yesu te ali?—

Yosefwe ni Maria yafuna ku Yerusaleme hanga afupe Yesu. Ayo yalipikala chinji mumu te kaso kumuwana. Alioze ha tangwa liamuchitatu, ayo yamuwana mu tembele! Yena unanyingika mumu liaka Yesu te ali mu Tembele?— Mumu mwenamo te mahasa kulilongesa hakutwala kuli Tato, Yehova. Iye te kakuzanga chinji Yehova nawa te kakuzanga kulilongesa chize mamuwahilila. Chipwe muze te iye hapwa mukulwana, nihindu Yesu te kakwononokena Yehova. Yesu te kakwononoka chipwe ngwe te muchipwa chikalu kuli iye hanji muchineha lamba. Shina Yesu te kakwononokena Yosefwe ni Maria?— Ewa, Mbimbiliya yinambe ngwo, iye te che akulinga.

Yika yena muhasa kulilongesa ha chilweza cha Yesu?— Ni yena chakutamba kwononokena yesemi je, chipwe ngwe muchipwa chikalu. Yena che mulinga?—