Wanangana Uze Muukayula Hashi Heswe

Yena unanyingika Wanangana wacho?—Ewa, uno uli Wanangana wa Zambi, uze muukapwisa hashi heswe paraisu. Yena unazange kulilongesa nawa hakutwala ku Wanangana wacho?—

Wanangana weswe ukwete umwe mwanangana. Nawa mianangana kakuyula atu a mu yifuchi yo. Yena unanyingika Mwanangana wa mu Wanangana wa Zambi?— Kali Yesu Kristu. Iye katwama mu malilu. Kwasala hakehe iye apwe Mwanangana wa atu hashi heswe! Kuchi wanyonga, shina mutukawahilila chinji muze Yesu makapwa Mwanangana wa hashi heswe?—

Yetwe mutukawahilila chinji! Mu Paraisu, atu kechi kalilamba chipwe kuliasa jita umwe ni mukwo. Atu eswe makapwa ni zango kuli umwe ni mukwo. Niumwe makayiza hanji kufwa wakwihi. Tupuputa kumakamona, tujika matwi kumakevwa, nawa waze keshi kuhasa kwenda kumakenda ni kutumbwoka. Atu eswe makapwa ni yakulia yinji. Nawa tushitu eswe makapwa masepa umwe ni mukwo ni kuli atu. Atu waze hanafu kumakaahindwisa. Malunga ni mapwo waze yena walilongesa ha kamukanda kano, ngwe Rebeka, Rahape, Ndawichi ni Eliya, kumakaahindwisa hanga akatwame nawa ni mwono! Yena unazange kuliwana ni atu wano muze makaahindwisa?—

Yehova kakukuzanga nawa iye kanazange hanga yena uwahilile. Nyi wanunga ni kulilongesa hakutwala kuli Yehova ni kumwononokena, yena muukapwa ni uhashi wa kutwama ni mwono wa miaka yeswe hano hashi mu yimwe paraisu yipema! Che yena unazange?—