Mwakuhwishila Yipikalo

Muze hinwalimbata, munuhasa kupwa ni yipikalo yeka ni yeka. Munuhasa kupwa ni yipikalo yacho mumu nwalisa mu manyonga jenu, mu yitanga ni chize nwakumona yuma ya mu mwono. Yipikalo muyihasa nawa kukatuka kuli atu eka chipwe ku yuma yeka.

Chili chashi kweseka kuchina yipikalo, alioze Mbimbiliya yatulweza ngwo twatamba kutala ha ukalu weswe mutumona. (Mateu 5:23, 24) Munuhasa kukumba yipikalo yenu ha kukaula shimbi ja mu Mbimmbiliya.

1 HANJIKENU HA UPIKALO NULI NAWO

YIZE MBIMBILIYA YINAMBE: “Chuma cheswe chili ni . . . tangwa lia kuhanjika.” (Chilumbununyi 3:1, 7) Pwako ni shimbu yakuhanjika ha ukalu nuli nawo. Lweka yoze walimbata nenyi chize unevu ni chize unanyongo ha chikuma chacho. “Hanjika umwenemwene” mashimbu eswe ni yoze walimbata nenyi. (A-Efwesu 4:25) Chipwe mukusoloka kapinda munene, nihindu kanda nulizwelesa. Kukumbulula ni uhumikizo muchihasa kuhwisa luvundo.​—Yishima 15:4; 26:20.

Chipwe tuhu kunwalitayijile, nihindu lihumikize, ni kusolola zango ni vumbi kuli yoze walimbata nenyi. (A-Kolosu 4:6) Esekenu kuhwisa kawashi kapinda wacho, kanda nwecha kulihanjikisa.​—A-Efwesu 4:26.

YIZE MUHASA KULINGA:

• Sakula shimbu yipema ya kuhanjika ha upikalo nuli nawo

• Muze mukwenu mahanjika, mupanjike, kanda umuteta maliji. Shimbu ye yakuhanjika muyiza

2 PANJIKA WIVWE KANAWA

YIZE MBIMBILIYA YINAMBE: “Lifwilenu ni utu umwe kuli mukwo ni mukwo. Ha ulemu, eswe akaliange kuulweza kuli mukwo.” (A-Roma 12:10) Kupanjika chili ni ulemu unji. Fupa kunyingika manyonga ja yoze walimbata nenyi ni ‘mbunge ya vumbi, ni kulikehesa.’ (1 Petulu 3:8; Tiangu 1:19) Kanda ulionga ngwe kuunamupanjika. Nyi muchihasa, echa yeswayo unalinga hanga upanjike yoze walimbata nenyi, chipwe kwita hanga nukahanjika shimbu lieka. Nyi wanyonga ngwe yoze walimbata nenyi kali sepa lie hi mukwa-kole we ko, kuchi “kulipupula kutenuka ku mbunge.”​—Chilumbununyi 7:9.

YIZE MUHASA KULINGA:

• Ena panjika wika, chipwe tuhu kuwazangile yize anahanjika

• Nyingika kwamba yize iye anambe. Tala chize anevu ni chize lili lienyi liji

3 KAULA YIYULO YENYI

YIZE MBIMBILIYA YINAMBE: “Milimo yeswe yili ni kufumbuka, pande ja mivumbo jakutwala ku uswale wika.” (Yishima 14:23) Kutayiza ha chiyulo chipema kuchishi kuhwisa mulonga. Nwatamba kukaula yiyulo yize nwalivwashana. Chino muchihasa kufupiwa kusa tachi hakulinga chocho, alioze chakuneha yiwape yinji. (Yishima 10:4) Nyi munuzachila hamuwika, munutambula “kwononona chipema” ha tachi jize nunase.​—Chilumbununyi 4:9.

YIZE MUHASA KULINGA:

• Wanenu yize mutu ni mutu atamba kulinga mba nuhwise upikalo nuli nawo

• Ha mashimbu eswe, talenu ha chize yuma yinende