Yihela Yetu ya Uwayilo

YEHOVA kahana atu jenyi shimbi ya kupwa ni kulikungulula hanga alilongese ni kulikolweza umwe ni mukwo. (Hepre. 10:23-25) Chihela chitangu chize A-Izalele apwile ni kulikungulwila hanga awayile Zambi chapwile “tabernakulu ni mbalaka ya chikungulwila.” (Kutuhu. 39:32, 40) Ha kupalika cha mashimbu, mwana wa Ndawichi, Solomone, yatunga zuwo hanji ngwetu tembele, yize yahanyine uhenya kuli Zambi. (1 Mia. 9:3) Muze anongesene tembele yacho ha mwaka wa 607 K.M.J., A-Yunda yaputuka kuwayila Zambi mu mazuwo waze avulukile ngwo sunangonga. Kulutwe, muze atungulwile tembele, yaputuka kuyizachisa nawa ngwe chihela cha uwayilo wamwenemwene. Yesu kapwile ni kulongesela atu mu masunangonga ni mu tembele. (Luka 4:16; Yoa. 18:20) Yesu kalongesele nawa atu ni ku mulundu.—Mateu 5:1–7:29.

² Muze Yesu afwile, akwa-Kristu yaputuka kulikungulwila mu yihela yeka ni yeka ni mu mazuwo ja mandumbu hanga alongese atu umwenemwene ni kupwa hamuwika ni mandumbu jo. (Yili. 19:8, 9; Roma 16:3, 5; Kolo. 4:15; Fwilim. 2) Ha mashimbu amwe akwa-Kristu kapwile ni kulikungulwila ku yihela kuze te akwa-kole jo mahona kunyingika. Tuvumbi twa Zambi ashishika a ku shakulu te kakuzanga chinji kulikungulula hanga ‘aalongese kuli Yehova.’—Iza. 54:13.

³ Ni musono nawa, akwa-Kristu kakulikungulwila mu yihela ya mbunga ni mu mazuwo ja mandumbu. Kanji-kanji kakuliwanyina mu mazuwo ja mandumbu ha kulilulieka hanga aye mu munda. Mandumbu kakuwahilila chinji hanga alikungulwile mu mazuwo jo. Mandumbu anji ngwo kakuyuka chinji ku ufulielo ha kuhana mazuwo jo hanga mandumbu alikungulwilemo.

ZUWO LIA WANANGANA

⁴ Chihela chize Yela ja Yehova alikungulwilamo kachivuluka ngwo Zuwo lia Wanangana. Kanji-kanji twakulanda chihela ni kutungaho Zuwo lia Wanangana, hanji kutungulula wika zuwo likulu. Yikungulwila yinji muyihasa kuzachisa Zuwo lia Wanangana limuwika hanga tuhase kufunga mbongo ni kujizachisa kanawa. Mu yifuchi yimwe kakulukala wika zuwo lia kulikungulwila. Mazuwo a Wanangana waze akulinga akutunga hanji kutungulula chinji, kakwalingila programa yakwakunjika kuli Yehova. Alioze nyi ku Zuwo lia Wanangana maluliekako wika tu yuma tukehe-tukehe, Zuwo liacho kechi kulikunjika cheka kuli Yehova.

⁵ Zuwo lia Wanangana kuliafupiwile kupwa lia mbongo jinji, hanga ngwo likomwese atu. Chipwe ngwe mazuwo jacho kakwatunga kulita ni chihela, nihindu liatamba kupwa lialita. (Yili. 17:24) Zuwo lia Wanangana liatamba kupwa chihela chipema chize mandumbu mahasa kulikungulwila kanawa, kulita ni ku chihela kuze liatwama.

⁶ Hita chikungulwila, chakuhana jimwe mbongo ja kufunga najo Zuwo lia Wanangana lize akulikungulwila. Chipwe chocho, keshi kwitako mbongo. Mu hita Zuwo lia Wanangana mwatwama mushete wakusa milambu, yize yakukwasa ku yuma yeswayo muyifupiwa ku Zuwo lia Wanangana. Atu kakuhana milambu ni mbunge jo jeswe.—2 Kori. 9:7.

⁷Mandumbu eswe mu chikungulwila kakuzanga kuhana milambu yakukwasa ku yize muyifupiwa ha Zuwo lia Wanangana ni kulihana ene apwe ni kupemesa ha Zuwo lia Wanangana. Kanji-kanji kakusakula mukulwana hanji kavumbi wa mu chikungulwila alinge katalilo wa milimo yacho. Hita chizavu cha mulimo wa mu munda chakukomba mu Zuwo lia Wanangana ni usongwelo wa kasongo wa chizavu chacho hanji yoze wakumukwasa. Zuwo lia Wanangana liatamba kusoloka kanawa haze ni muchima hanga lifumanyise Yehova ni ululikiso wenyi.

⁸ Nyi mu Zuwo lia Wanangana muli yikungulwila yinji, makulwana a mu yikungulwila yacho kakusakula Komite ya Kutala ha Zuwo lia Wanangana hanga asongwele milimo yeswe mapwa ni kulinga ha Zuwo lia Wanangana. Yizavu ya makulwana ye yakusakula ndumbu yoze mapwa kasongo wa komite yacho. Ayi komite yakukaula usongwelo wa yizavu ya makulwana, ni kupwa ni shindakenyo ngwo, Zuwo lia Wanangana lili kanawa nawa lili ni yuma yeswe yize muyifupiwa. Kashika, yikungulwila yeswe yatamba kuzachila hamuwika.

⁹ Nyi Zuwo lia Wanangana likwete yikungulwila yinji, mahasa kupwa ni kwalumwonako mashimbu a kukunguluka. Makulwana a mu yikungulwila kakulinga katalilo mupema yoze makwasa mandumbu jo eswe. (Fwili. 2:2-4; 1 Petu. 3:8) Nichimwe chikungulwila chili ni ulite wa kukwachila chiyulo chikungulwila chikwo chakuhi. Muze kalayi wa mbonge mameneka chikungulwila chimwe, yikungulwila yikwo yize yakuzachisa Zuwo lia Wanangana yatamba kwalumuna matangwa a kukunguluka cho cha ha poso.

¹⁰ Mu Zuwo lia Wanangana mahasa kulingilamo pande ja umbachiso hanji ja ufwe nyi Komite ya Mulimo ya Chikungulwila yinatayiza. Komite yacho yakutala ha yize mafupa kulingila mu Zuwo lia Wanangana kulita ni usongwelo wa ku mutango.

¹¹ Mandumbu waze akutayiza hanga azachise Zuwo lia Wanangana katamba kulifunga kanawa ni kusolola ndako jipema ja akwa-Kristu. Katambile kulingila ku Zuwo lia Wanangana yuma yize muyitalingisa mandumbu, hanji kupihisa lufuma wa Yehova ni chikungulwila. (Fwili. 2:14, 15) Mutango muuhasa kutayiza hanga Zuwo lia Wanangana alizachise ha programa jikwo ja ku ufulielo ngwe, Shikola ya Mulimo wa Wanangana ni Shikola ya Mulimo wa ma Pionelu.

¹² Mandumbu katamba kuvumbika chihela chize akulikungulwila. Kuzala cho ni chize masoloka yatamba kusolola ngwo, kali akwa-kuwayila Yehova. (Chilu. 5:1; 1 Timo. 2:9, 10) Nyi twakaula usongwelo uno, mutusolola ngwetu twakulemesa kukunguluka chetu.

¹³ Ha mashimbu a kukunguluka, atu eswe katamba kulifunga kanawa. Yisemi katamba kutwama ni ana jo. Muchipema nyi yisemi waze ali ni twanuke akehe-akehe matwamina kunyima kuze kechi kuzungwila akwo. Chino muchaashiwila kutwala ana haze akaholese hanji kwalingila yeswayo muyifupiwa.

¹⁴ Kakutongola mandumbu ajama hanga akalakale ngwe akwa-kutambwisa atu mu Zuwo lia Wanangana. Katamba kukanyama, kuseha-seha ni kupwa ni vumbi. Chiteli cho chili kutambwisa ngeji, kufupila yihela waze akulaluka kuheta, kwalula atu ali ha kukunguluka ni kusa shindakenyo ngwo yuma yeswe yili kanawa mu Zuwo lia Wanangana. Ha mashimbu amwe, tuvumbi katamba kulweza yisemi afunge kanawa ana jo hanga achine kuzombwoka ku uputukilo ni ku songo lia kukunguluka chipwe kuya ni kuhehela haze akuhanjikila pande. Nyi kanuke kananeha zungo linji, kavumbi mahasa kulweza chisemi ni vumbi hanga atuhuke ni mwanenyi haze hanga ahone kuzungwila akwo. Mulimo wa tuvumbi wakukwasa chinji hanga eswe mu chikungulwila apanjike kanawa pande ha kukunguluka. Kanji-kanji mulimo wacho katamba kuulinga kuli tuvumbi ni makulwana a mu chikungulwila.

MULIMO WA KUTUNGA MAZUWO A WANANGANA

¹⁵ Ku sekulu yitangu, mandumbu amwe kapwile ni upite unji kuhiana akwo, kashika postolo Paulu asonekene ngwenyi: “Kulumbama chenu haliapwila chikalite ni kuhona cho, hanga kulumbama cho nawa chikapwe ha kuhona chenu; hanga chikapwe kulita.” (2 Kori. 8:14) Chipwe musono yuma yino yakulingiwa. Milambu yize akuhana mu yikungulwila yeswe kakuyichinga hanga yikwase mulimo wa kutunga ni kutungulula Mazuwo a Wanangana. Twakusakwilila chinji mandumbu a hashi heswe ha milambu yize akuhana, yize yinakwasa chinji ululikiso wetu ni yikungulwila yinji.

¹⁶ Hanyima lia kuhengwola yeswe, mutango wakulweza yikungulwila Zuwo lia Wanangana lize malikungulwila. Mandumbu ku mutango e akutongola nawa kuze atamba kutunga hanji kutungulula Zuwo lia Wanangana ni shimbu lize akulinga mulimo wacho. Muze kwakulingiwa umwe luyinda, kakululieka yuma hanga atungulule Mazuwo a Wanangana ni mazuwo amwe a mandumbu waze alienyeka.

¹⁷ Mandumbu a ku mutango e akusongwela akwa-kulihana hanga alande yihela ya kutungaho Mazuwo a Wanangana, kufunjeka mazuwo jacho, kutambula lisesa lia kutunga nacho, kwatunga ni kwalulieka. Kunafupiwa akwa-kukwasa anji hamukunda wa kwoka cha Mazuwo a Wanangana waze anafupiwa mu yifuchi yinji. Akwa-kwambujola akupapachisa waze anazange kukwasa mulimo wacho kanakolweza asoneke fomulario ya kulisonekesa ku mulimo wacho ni kuyihana ku Komite ya Mulimo ya Chikungulwila cho. Ni akwa-kwambujola waze kanda achapapachisa no mahasa kukwasa ku mulimo wacho.

MAZUWO A KUKUNGULUKA CHINENE

¹⁸ Akwa-Kristu atangu, kapwile ni kulikungulwila mu yizavu yikehe-yikehe. Alioze ha mashimbu amwe kapwile ni kulikungulula “mbunga yinene.” (Yili. 11:26) Chipwe musono, atu ja Yehova kakupwa ni kukunguluka chinene chize avuluka ngwo, kukunguluka cha mbonge ni cha mambonge. Kanji-kanji kakulukala yihela yakulingila kukunguluka chacho. Alioze ku yihela yimwe, kakutunga yihela yize avuluka ngwo, Mazuwo a Kukunguluka Chinene.

¹⁹ Ha mashimbu amwe, kakulanda mazuwo ni kwatungulula apwe Mazuwo a Kukunguluka Chinene. Alioze ha mashimbu akwo kakulanda yihela ni kulinga akutunga. Mazuwo a Kukunguluka Chinene kalisa kulita ni yize yinafupiwa. Mandumbu ku mutango chitangu kakulianga kuhengwola mbongo mujifupiwa ni yisuho yize mazachisa zuwo liacho mba amone nyi malanda hanji kutunga zuwo liaha.

²⁰ Mutango we wakutongola mandumbu waze mapwa ni kufunga ni kululieka Mazuwo a Kukunguluka Chinene. Mandumbu a mu hita mbonge kakuya ni kululieka, kukomba-komba ni kupemesa yihela yacho kaali ha mwaka. Chakukwasa chinji muze mandumbu akulihana hanga alinge mulimo wacho. Kashika, akukolweza mandumbu mu yikungulwila alinge mulimo wacho ni mbunge yo yeswe.—Samu 110:3; Mala. 1:10.

²¹ Mashimbu amwe, Zuwo lia Kukunguluka Chinene kakulingilamo programa jikwo ja ku ufulielo ngwe, mashikola a mu ululikiso wetu ni kukunguluka chalipwila cha tulayi a mbonge. Ngwe chize akulinga ni Mazuwo a Wanangana, Mazuwo a Kukunguluka Chinene no kakwakunjika kuli Yehova. Muze mutulikungulwila mu Zuwo lia Kukunguluka Chinene, yitanga ni mulali wa kuzala chetu yatamba kusolola vumbi ngwe chize twakulinga ku Zuwo lia Wanangana.

²² Ha matangwa wano akusula, atu anji kaneza mu ululikiso wa Yehova. Ayi yeswe yinasolola ngwo Yehova kanapale mulimo wenyi. (Iza. 60:8, 10, 11, 22) Kashika, tunazange kukwasa milimo yize yinalingiwa mu ululikiso wa Yehova ya kutunga, kululieka ni kupemesa yihela yize twakulikungulwila. Nyi twalinga chocho, mutusolola ngwetu twakulemesa yihela yize twakulikungulwila hanga tulikolweze umwe ni mukwo muze tangwa lia Yehova linakundama.