Nunga mu Ululikiso wa Yehova

KAMBAJI Tiangu kasonekene ngwenyi: “Kundamenu kuli Zambi, mba iye kumakakundama kuli yenu.” (Tia. 4:8) Chipwe ngwe Yehova kali Mukwa-Ndundo-Jeswe, nihindu iye katwamine kusuku ni yetu mumu kakwivwa yilemba yetu. (Yili. 17:27) Kuchi mutuhasa kukundama kuli Zambi? Ha kukolesa usepa wetu ni iye, ni kukundama kuli iye mu yilemba. (Samu 39:12) Jila yikwo yili kulilongesa Liji lienyi, Mbimbiliya, matangwa eswe. Chino muchitukwasa kunyingika Yehova Zambi, upale wenyi ni yize anazange kutulingila. (2 Timo. 3:16, 17) Muchitukwasa nawa kumuzanga ni kwivwa woma wa kulinga yuma yize muyimuvwisa chinyengo.—Samu 25:14.

² Alioze, mutuhasa kupwa masepa ja Yehova kupalikila wika muli Mwanenyi, Yesu. (Yoa. 17:3; Roma 5:10) Niumwe mutu mahasa kutulumbunwina kanawa manyonga ja Yehova kuhiana Yesu wakuhi. Iye kanyingikine kanawa Tato, kashika ambile ngwenyi: “Niumwe manyingika chize mwe Mwana apwa shina Tata; ni chize apwa Tata shina mwe Mwana, ni kuli mweswawo yoze mwe Mwana mapala kumusolola.” (Luka 10:22) Kashika muze twakulilongesa mikanda ya Evanjelu hanga tunyingike manyonga ni kupwa cha Yesu, twakunyingika nawa manyonga ja Yehova ni kupwa chenyi. Chinyingi chino, chakutukwasa kupwa masepa ja Zambi.

³ Yesu kakutusongwela hanga tupwe ni usepa upema ni Yehova ni kununga kupwa mu ululikiso wenyi wa hano hashi uze wakutukwasa kulinga upale wa Yehova. Ngwe chize aprofetezele ha Mateu 24:45-47, Mwene wetu Yesu Kristu hanase ‘ndungo wamwenemwene, wakanyama’ hanga ahane “kulia ha mwaka wa chikala” kuli akwa-zuwo lienyi. Musono, ndungo wacho kanatwehe kulia chinji cha ku ufulielo. Kupalikila muli ndungo wacho, Yehova kanatukolweza hanga tutange Mbimbiliya hita tangwa, kuya kukukunguluka ni kwambujola “sango lipema lia Wanangana wa Zambi.” (Mateu 24:14; 28:19, 20; Yoshu. 1:8; Samu 1:1-3) Kutwatambile kupwa ni manyonga api hali ndungo wamwenemwene, wakanyama. Twatamba kusa tachi hanga tununge mu chihanda cha ululikiso wa Yehova cha hano hashi ni kukaula usongwelo wamo. Chino muchitukwasa kukundama kuli Yehova, kututakamisa ni kutufunga muze mutupalika mu yipikalo.

MUMU LIAKA YESEKO YINANUNGU NI KWOKA?

⁴ Hanji uli mu umwenemwene ha miaka yinji. Nyi chocho, unanyingika chize twakupalika mu yeseko mumu lia ululi. Alioze chipwe ngwe wanyingika Yehova ni ululikiso wenyi haliapwila, nihindu hiwanyingika ngwe Satana Ndiapu kakulimika ni waze eswe akuzeyela ku wata wa Yehova. (2 Timo. 3:12) Kashika, chipwe ngwe unapalika mu yihungumiona yinji hanji yikehe, kukushi chitela chakwivwa woma hanji kuhonga. Yehova kanalakenya ngwenyi makukwasa, makuwahisa mba kulutwe makakwaha mwono wa mutolo.—Hepre. 13:5, 6; Uso. 2:10.

⁵ Tulieswe mutuhasa kupalika mu yeseko ha matangwa wano akusula mu chifuchi chino cha Satana. Kukatuka haze ajamishine Wanangana wa Zambi ha mwaka 1914, Satana keshi kuya nawa mu malilu muze Yehova atwama. Iye ni angelo jenyi api kaanyashine hano hashi haze mahasa kulinga yeswayo mazanga. Kwoka cha lamba hano hashi ni yihungumiona yize anapalikamo tuvumbi twa Yehova, yeswe yinakatuka ku ufwatulo wa Satana. Yino yeswe yinasolola ngwo tuli kusongo lia kuyula chenyi chipi hano hashi.—Uso. 12:1-12.

⁶ Satana kali ni ufwatulo unji, mumu kananyingika ngwenyi hikwamusala mashimbu akehe. Iye ni andemoniu jenyi, kakusa tachi hanga apinjise mulimo wetu wa kwambujola ni kwenyeka kulinunga cha tuvumbi twa Yehova. Yino yinatupwisa ngwe tunase jita ya ku spiritu yize Mbimbiliya yinambe ngwo: ‘Kutushi kulimika ni atu a musunya ni manyinga. Alioze twakulimika ni mawanangana, ni yiyulo, ni ene ja milima ya mwakono, ni maspiritu a ungulungulu muma mwa malilu.’ Nyi tunazange kukumba, kutwatambile kwecha kwasa jita yacho, twatamba kufunga kanawa mazalo jetu a utale a ku spiritu. Twatamba ‘kumana ngu, ni kulimika ni Ndiapu hamwe ni unjiliji wenyi weswe.’ (Efwe. 6:10-17) Kashika, twatamba kunyongonona wika.

CHIZE MUTUHASA KUNYONGONONA

⁷ Kunyongonona chinalumbunuka kupalika mu “yipikalo hanji mu lamba” chakuhona kuhonga. Ku ufulielo, kunyongonona chinalumbunuka kumana ngu ni kulinga yuma yalita chipwe muze tunamono lamba, tuli mu ukanjiso, mu yihungumiona hanji tunapalika mu chuma cheswacho muchihasa kupihisa ushishiko wetu kuli Zambi. Twatamba kusa tachi mba tupwe ni kunyongonona chize chinafupiwa kuli akwa-Kristu. Kulinga chino, chakumbata mashimbu. Muze tunayi ni kujama ku ufulielo, ni kunyongonona chetu necho chakukola. Muze twakukumba yeseko yikehe-yikehe ya ku ufulielo yize yakusoloka ku mwono wetu ngwe akwa-Kristu, twakujama ni kupwa ni uhashi wa kukumba yeseko yinene-yinene yize muyiza kulutwe. (Luka 16:10) Kutwatambile kushimbwila ndo haze mukusoloka yeseko yinene-yinene, mba tukwate chiyulo cha kumana ngu mu ufulielo. Chiyulo chino twatamba kuchikwata shimbu kanda kuchisoloka yeseko. Postolo Petulu kasolwele ngwenyi kunyongonona chatamba kukalakalila hamuwika ni yitanga yikwo yipema yize yakuvwisa Zambi kuwaha, ha kusoneka ngwenyi: “Wezenu yenwene kulipupwisa cheswe, ha ufulielo wenu, wezenu tachi; ha tachi jenu wezenu yinyingi. Ha yinyingi yenu, wezenu kusuula; ha kusuula chenu wezenu kunyongonona; ha kunyongonona chenu wezenu uwayilo; ha uwayilo uenu wezenu vumbi lia undumbu; ha vumbi lia undumbu wenu zango.”—2 Petu. 1:5-7; 1 Timo. 6:11.

⁸ Tiangu kasolwele ulemu wa kusa tachi hanga tununge ni kunyongonona muze asonekene ngwenyi: “Mandumbu jami, muze yeseko yeka ni yeka muyinuwana, chinyongenu kupwa uwahililo unene; se nunanyingika kweseka cha ufulielo wenu kuchakulinga kunyongonona. Alioze kunyongonona chikaye ndo ku songo lia milimo yacho, hanga nukapwe angunu, a muwundu, nikuhona nichimwe.” (Tia. 1:2-4) Tiangu kambile ngwenyi, twatamba kuwahilila muze mutupalika mu yihungumiona, mumu chino chakutukwasa tunyongonone. Shina che wakunyonga ha chikuma chacho? Kulutwe, Tiangu yasolola nawa ngwenyi kunyongonona chapwa chilemu ku mwono wetu mumu chakutukwasa tululieke utu wetu wa Ukristu ni kupwa ni utayizo wa Zambi. Kashika, twakupwa ni tachi ja kunyongonona hita tangwa muze mutupalika mu yeseko ni kuyikumba. Nyi mutusa tachi ni kunyongonona, mutupwa ni yitanga yikwo yipema yize tunafupiwa.

⁹ Kunyongonona chetu chakuvwisa Yehova kuwaha. Hamukunda wa kunyongonona chacho, mutukazuka mwono wa mutolo. Tiangu yamba nawa ngwenyi: “Kawaha mutu yoze manyongonona mu cheseko; mumu muze hamusela shindakenyo yipema, makatambula chipangula cha mwono, chize Mwene hanalakenya kuli waze akumuzanga.” (Tia. 1:12) Chochene, twakunyongonona mumu tuli ni kutalatala cha mwono wa mutolo. Nyi kutwanyongonwene, kutuchi kuhasa kununga mu umwenemwene. Nyi mutulinga yuma ya hano hashi, mutuhasa kufuna kunyima. Nyi kutwanyongonwene, kutuchi kupwa ni spiritu ya Yehova ni kwima mihuko ya spiritu ku mwono wetu.

¹⁰ Nyi tunazange kunyongonona ha matangwa wano akalu, twatamba kupwa ni nyonga lialita ha lamba lize yetu akwa-Kristu twakumona. Iwuluka ngwe Tiangu kasonekene ngwenyi: “Muze yeseko yeka ni yeka muyinuwana, chinyongenu kupwa uwahililo unene.” Muchihasa kupwa chikalu kuwahilila muze tunamono lamba mumu lamba mulihasa kupihisa manyonga jetu ni mujimba wetu. Alioze tunyingikenu ngwetu, nyi kutwanyongonwene mutuhasa kutokesa kutalatala cha mwono wa mutolo. Yize yalingiwile kuli apostolo ha mashimbu amwe, yinatukwasa kunyingika chize mutuhasa kuwahilila muze tunamono lamba. Mukanda wa Yilinga unambe ngwo: “Muze te hatambika apostolo, yaalamba, yaakanjisa ngwo, Kanda nukahanjika nawa mu jina lia Yesu, mba yaecha kuya. Kashika apostolo yakatuka kumeso ja akwa kuyula, nikuwahilila se Zambi yaanyonga akwa kutela kusauka mumu ha lie Jina lia Yesu.” (Yili. 5:40, 41) Lamba lize apostolo amwene liasolwele pundu ngwo, kononokene ku shimbi ya Yesu ni kupwa ni utayizo wa Yehova. Kulutwe, muze Petulu asonekene mukanda wenyi utangu, yahanjika hakutwala ha lamba lize amwene mumu lia ululi.—1 Petu. 4:12-16.

¹¹ Chilweza chikwo chili cha Paulu ni Saila. Muze te ali mu mulimo wa mishionaliu mu Fwilipu, yaakwata ni kwaliongela ngwo kanapihisa mbonge ha kwambujola ndako jo. Chocho, yaalamba ni kwasa mu zuwo lia ususu. Mbimbiliya yinambe ngwo, muze te ali mu zuwo lia ususu “ha muchima ufuku Paulu ni Saila apwile nikulemba, nikwimba miaso kuli Zambi, ni funge akwo yaapanjika.” (Yili. 16:16-25) Paulu ni Saila kapwile ni nyonga lialita ha lamba lize amwene mumu lia Kristu. Kamwene lamba liacho ngwe chilayi cha kushishika cho kuli Zambi ni kuli atu, ni jila yakuhanyinamo uchela kuli waze te mazanga kwivwa sango lipema. Mwono wa atu akwo wapwile mu ponde. Ha ufuku wacho, kalayi wa zuwo lia ususu ni asoko jenyi yevwa sango lipema, yaapapachisa ni kupwa tumbaji twa Kristu. (Yili. 16:26-34) Paulu ni Saila kajikijilile ha ndundo ja Yehova ni kunyingika ngwo iye te kumaakwasa kukumba yipikalo yo. Ayo kakalisehele.

¹² Ni musono nawa, Yehova kakutukwasa muze tunapalika mu yipikalo. Iye kanazange hanga tunyongonone. Yehova hanatwehe Liji lienyi hanga litukwase kunyingika upale wenyi. Yino yakutakamisa ufulielo wetu. Tuli ni uhashi wa kulikungulula ni mandumbu jetu ni kulinga mulimo usandu. Tukwete nawa uhashi wa kukundama kuli Yehova kupalikila mu yilemba. Iye kakupanjika yilemba yetu muze twakumuhalisa ni kwita hanga atukwase tupwe ni mbunge yitoma kumeso jenyi. (Fwili. 4:13) Chikwo nawa, kutwatambile kuvulama tachi jize twakuwana muze twakupukuna ha kutalatala chetu.—Mateu 24:13; Hepre. 6:18; Uso. 21:1-4.

CHIZE MUTUHASA KUKUMBA YESEKO YEKA-NI-YEKA

¹³ Yeseko yize tunamono musono, yinalifu ni yize amwene tumbaji atangu a Yesu Kristu. Musono, atu waze kanyingikine kanawa Yela ja Yehova, kakuhanjika yuma yipi hali ayo ni kwamwesa lamba. Chizechene ngwe ha matangwa ja apostolo, yihungumiona yinji yakukatuka kuli akwa-mangeleja waze Liji lia Zambi liakusolola zwalala ngwo yitanga yo ni yize akulongesa yapwa ya mahuza. (Yili. 17:5-9, 13) Ha mashimbu amwe, tuvumbi twa Yehova kakuwana uhwimino ha kwita ukwaso wa manguvulu. (Yili. 22:25; 25:11) Alioze ha mashimbu akwo, manguvulu kakulimika ni yetu ha kukanjisa mulimo wetu wa kwambujola. (Samu 2:1-3) Ha mashimbu jacho, twakwimbulula hamu lia apostolo waze ambile ngwo: “Chatutamba kwononoka kuli Zambi, hi kuli atu ko.”—Yili. 5:29.

¹⁴ Amu atu anazange chinji yifuchi yo, mandumbu kakwashinjila hanga eche kulinga mulimo wa kwambujola uze ahele kuli Zambi. Chino chakukwasa tuvumbi eswe a Zambi hanga anyingike ulemu wa utowezo uli ha Usolwelo 14:9-12 hakutwala ku uwayilo wa “ngongo ni kaponya kenyi.” Tunanyingika ulumbunwiso wa maliji a Yoano anambe ngwo: “Muno muchili kunyongonona cha asandu, waze akufunga maliji a shimbi a Zambi ni ufulielo wa Yesu.”

¹⁵ Jita ni yihungumiona yize yakukatuka kuli manguvulu, muyihasa kukukinda uhone kuwayila kanawa Zambi. Hanji muchihasa kukaliwa kulikungulula hamuwika ni mandumbu mu chikungulwila. Muchihasa nawa kukaliwa kuhanjika ni mandumbu ku mutango. Kalayi wa mbonge hanji keshi kuhasa kunumeneka. Hanji kunuchi kutambula nawa mikanda. Nyi yuma yino muyilingiwa, yika watamba kulinga?

¹⁶ Kumbululo lili ngwo, linga yeswayo muhasa kulinga kulita ni uhashi we. Alioze watamba kununga ni kulinga longeso lie lia wika. Kanji-kanji yizavu yikehe, muyihasa kulikungulwila ku mazuwo ja mandumbu. Munuhasa kuzachisa mikanda yize nwalilongesele kulu hamwe ni Mbimbiliya ha kukunguluka chacho. Kanda ulipikala hanji kwivwa woma. Mumu, kanji-kanji, Chizavu cha Tusongo chakufupa kawashi-washi jila yize mahanjikilamo ni mandumbu waze ali ni yiteli.

¹⁷ Chipwe ngwe uli kusuku ni mandumbu je a mu ufulielo, nihindu nyingika ngwe kushi kusuku ni Yehova hamwe ni Mwanenyi, Yesu Kristu. Kutalatala che muchihasa kununga ni kukola. Yehova nihindu manunga ni kwivwa yilemba ye ni kukutakamisa kupalikila mu spiritu yenyi yisandu. Fupa usongwelo wenyi. Nyingika ngwe, uli kavumbi ka Yehova nawa uli kambaji ka Yesu Kristu. Kashika, zachisa kanawa uhashi uze uli nawo hanga wambujole. Yehova mawahisa tachi je, mba kulutwe hanji atu akwo mahasa kulichinga ni yena mu uwayilo wamwenemwene.—Yili. 4:13-31; 5:27-42; Fwili. 1:27-30; 4:6, 7; 2 Timo. 4:16-18.

¹⁸ Alioze, nyi mafupa kukushiha ngwe chize alingile kuli apostolo ni atu akwo, fuliela muli Zambi yoze “wakuhindwisa afu.” (2 Kori. 1:8-10) Kutalatala che ha uhindukilo, muchikukwasa unyongonone chipwe ngwe mafupa kukushiha. (Luka 21:19) Yesu Kristu kahichikile chilweza chipema. Iye kanyingikine ngwenyi kushishika chenyi mu yihungumiona te muchitakamisa akwo hanga no anyongonone. Ni yena nawa, muhasa kupwa chilweza chipema cha utakamiso kuli mandumbu je ngwe chize Yesu alingile.—Yoa. 16:33; Hepre. 12:2, 3; 1 Petu. 2:21.

¹⁹ Kuchizako yihungumiona ni yeseko, muhasa nawa kupalika mu yuma yikwo yikalu. Chakutalilaho, amwe kakuhonga mumu atu a mu njiza yo keshi kutayiza sango lipema. Eka kakwete misongo yinene, kakuhonga chinji ku mbunge hanji kupalika mu yuma yize yakwiza mumu lia kupwa yihenge. Postolo Paulu neye kapalikile mu yuma ya mutapu au, yize yapwile ni kumupinjisa hanji kupwisa mulimo wenyi ukalu. (2 Kori. 12:7) Epafwonditu, umwe mukwa-Kristu wa mu Fwilipu ku sekulu yitangu, “kalemene ku mbunge” mumu masepa jenyi kevwile ngwo iye kanayiji. (Fwili. 2:25-27) Uhenge wetu ni wa akwetu newo muuhasa kuneha yipikalo yize muyihasa kukaliwa kuyikumba. Mutuhasa kuhona kulivwashana ni akwa-Kristu-ni-akwetu hanji asoko jetu mumu lia kalisa wa utu wetu. Alioze waze akukaula yiyulo ya Mbimbiliya, mahasa kukumba kapinda wacho.—Eze. 2:3-5; 1 Kori. 9:27; 13:8; Kolo. 3:12-14; 1 Petu. 4:8.

TUNUNGENU NI KUSHISHIKA

²⁰ Tunungenu ni kulalaminya kuli Yesu Kristu, yoze Yehova hanase ngwe mutwe wa chikungulwila. (Kolo. 2:18, 19) Twatamba kwononokena ‘ndungo wamwenemwene, wakanyama’ ni mandumbu akwo waze ali ni yiteli. (Hepre. 13:7, 17) Nyi mutukaula usongwelo wa Zambi ni kukalakala hamwe ni waze apwa tusongo, muchitukwasa kulinga kanawa upale wa Yehova. Twatamba kulemba chinji kuli Yehova. Tunyingikenu ngwetu, chipwe yikalakala ya zuwo lia ususu hanji yuma yeswayo, kuyichi kutukinda kuhanjika ni Tata yetu wa mu malilu hanji kwenyeka usoko wetu ni mandumbu jetu.

²¹ Tusenu tachi ni kunyongonona hanga tununge ni kulinga mulimo wa kwambujola uze Yesu Kristu ahanyine kuli tumbaji twenyi hakwamba ngwenyi: ‘Kashika yeenu nukatayise tumbaji a ku mavungu eswe, nikuapapachisa mu jina lia Tata, ni lia Mwana, ni lia spiritu yisandu: nikwalongesa kufunga yuma yize yeswe nanuhele shimbi.’ (Mateu 28:19, 20) Tunyongononenu ngwe chize Yesu alingile. Tunungenu ni kushimbwila Wanangana wa Zambi ni mwono wa mutolo. (Hepre. 12:2) Amu tuli tumbaji twa Kristu akupapachisa, chili kuyuka chinene kulichinga ni mandumbu hanga tumanunune uprofeto wenyi hakutwala ku “kumanunuka cha miaka.” Iye kambile ngwenyi: “Sango lino lipema lia Wanangana kumakaliambujola mu yifuchi yeswe ya hashi mukukapwa shindakenyo ku mavungu eswe, mba hohene songo kumulikeza.” (Mateu 24:3, 14) Kashika, nyi mutununga ni kulinga mulimo wacho ni mbunge yeswe, mutukawahilila ha kuzuka mwono wa mutolo mu chifuchi chaha cha ululi chize Yehova anatulakenya!