Kuchi Mbimbiliya Muyihasa Kungukwasa?

MUMU LIAKA CHINO CHILI CHILEMU

Mbimbiliya yinambe ngwo, “Yisoneko yeswe yapwa we mwiku wa Zambi.” (2 Timoteu 3:16) Nyi yino yili yamwenemwene, Mbimbiliya muyihasa kukwaha usongwelo uze unafupu.

**YIKA WATAMBA KULINGA?**

Achinyonga ha chino: Ndawichi kanendesa mashinyi mu yimwe tapalo yize kanyingikine kanawa. Mba maputuka kumona yilayi yinasolola ngwo te katambile kumona mu tapalo yize iye atamba kuya. Manyingika ngwenyi kanatoko. Kota muze awananga makano aye yanjila mu tapalo yeka.

Nyi yena uli Ndawichi, yika te mulinga?

CHITANGU NYONGA!

Uli ni yuma yinji muhasa kulinga:

Kuhula kuli mutu.
Kutala ha mapa, hanji kukalakala ni GPS.
Kununga ni kwendesa, hanji muwana tapalo yacho.

Kwamba umwenemwene, chuma chamuchitatu che chinalite.

Chuma chamuchaali necho chinalite kuhiana chitangu. Mumu mapa hanji GPS muyipwa ha moko je mu wenyi weswe, ni kukukwasa kunyingika mu jila watamba kuya.

Ni Mbimbiliya nawa che muyihasa kukukwasa!

Mukanda uno upema akulanjisa chinji muuhasa

kukusongwela ha chize watamba kukumba milonga ye ku mwono
kukukwasa hanga ulinyingike kanawa ni kupwa mutu mupema
kukusolwela chize muhasa kupwa ni mwono wa mutolo

KUMBULULO LIA YIHULA YILEMU YA KU MWONO

Chize muze twakuputuka kuhanjika, twakuhula yihula.

Mumu liaka malilu apwa alauluka?
Iya watangile tutongonoshi?

Mba mutuputuka kuhula hakutwala ku yuma yize twakumona hano hashi.

Mumu liaka yuma yipi yakulingiwa?
Mumu liaka atu akufwa?

Kuchi muwamba nyi kumbululo lia yihula yacho liatwama mu Mbimbiliya ha mashimbu eswe?

Atu anji kakwamba ngwo Mbimbiliya yili mukanda wa yishima ya kulumba, kuyishi ulemu, nawa ngwo yikalu chinji kulilongesa yo. Shina chamwenemwene mulonga uli Mbimbiliya nyi yuma yize atu akwivwa hakutwala ku Mbimbiliya? Hanji kakuonga hakutwala kumukanda wacho?

Chakutalilaho, atu kakunyonga ngwe Mbimbiliya yakwamba ngwo Zambi mwe unayulu hano hashi. Shina yino yili yamwenemwene? Hano hashi hanasoloka upi unji! Hanazala to ni kapinda hamwe ni lamba, yikola ni kufwa, uswale ni luyinda. Kuchi Zambi wa zango mahasa kuneha yuma yeswe ai yipi twakumona?

Unazange kuwana kumbululo? Mukomoka ha yize Mbimbiliya yinambe hakutwala kuli yoze unayulu hano hashi!

Ngwe chize unamono, utowezo uli ha mukanda uno unakatuka ha Mbimbiliya. Yela ja Yehova kali ni ushindakenyo ngwo Mbimbiliya yili ni usongwelo ungunu. Mumu “yisoneko yeswe yapwa we mwiku wa Zambi, neyo kuyafumbuka ha kulongesa, ni ha kukumika, ni ha kululamisa, ni ha kufumba mu ululi.” (2 Timoteu 3:16, 17) Kashika, watamba kuhengula mukanda uno ukulu—alioze nihindu uli ni sango jaha!