UTULIKILO WA MIKANDA HA INTERNET wa Watchtower
Watchtower
UTULIKILO WA MIKANDA HA INTERNET
Chokwe
  • MBIMBILIYA
  • MIKANDA
  • KUKUNGULUKA
  • lfb longeso 17 lif. 46-lif. 47 par. 2
  • Mose Yasakula Kuwayila Yehova

Kukushi nichimwe chinema.

Lisesa, kwasoloka kapalia ha kwazulula chinema.

  • Mose Yasakula Kuwayila Yehova
  • Yize Muhasa Kulilongesa mu Mbimbiliya
  • Yikuma Yalifwa
  • Kuchi Mwana-Kemba Mose Anakamulamwina
    Mukanda Wami wa Yishima ya Mbimbiliya
  • Umwe Mwanangana Mupi Kanayula mu Engitu
    Mukanda Wami wa Yishima ya Mbimbiliya
  • Mumu Liaka Mose Anachina
    Mukanda Wami wa Yishima ya Mbimbiliya
  • Luyinda Mutatu Yoze Walingiwile Chitangu
    Yize Muhasa Kulilongesa mu Mbimbiliya
Tala Nawa Yikwo
Yize Muhasa Kulilongesa mu Mbimbiliya
lfb longeso 17 lif. 46-lif. 47 par. 2
Kanuke Mose hamuwana kuli mwana wa pwo wa Falau, pangi yenyi Miriame kali hakamwihi ni kumutala

LONGESO 17

Mose Yasakula Kuwayila Yehova

Asoko ja Yakomba mu Engitu te kaavuluka ngwo A-Izalele. Muze Yakomba ni Yosefwe te hafwa kulu, umwe Falau mwaha yaputuka kuyula. Iye kapwile ni kwivwa woma ngwenyi, A-Izalele te mapwa ni ndundo jinji kuhiana A-Engitu. Hachino, Falau yacho yapwisa A-Izalele ndungo. Iye yaaha mulimo ukalu wakulinga tijolu ni kulima minda. Chipwe ngwe A-Engitu kapwile ni kwaalingisa milimo yikalu, nihindu A-Izalele te kakwoka chinji. Falau yatuma kushiha ana eswe a malunga waze te masemuka kuli A-Izalele, mumu te keshi kuwahilila ha kumona kwoka cho. Kunyonga lie, kuchi A-Izalele evwile ha chikuma chino?

Pwo Ka-Izalele yoze te avuluka ngwo Yokepete yasema mwana wa lunga mupema chinji. Mba amufunge, aye yamusa mu mutonga nawa yasweka mutonga wacho ha yambu mu Lwiji Nilu. Pangi wa mwana wacho, Miriame, yaswama hakamwihi hanga atale yize te muyilingiwako.

Mwana wa pwo wa Falau yeza ku lwiji ni kusana meya, chocho yamona mutonga wacho. Muze awazulwile yawanamo mwana-kemba unalila, aye yamwivwila keke jinji. Miriame yamuhula ngwenyi: ‘Shina munguhasa kuya hanga ngukufupile pwo yoze mahasa kukwamwishinayo?’ Muze mwana wa Falau atayijile, Miriame yaya ni kusanyika naye, Yokepete. Mwana wa Falau yamulweza ngwenyi: ‘Yako ni mwana au hanga ungwamwishineyo, mungukufweta.’

Mose kanachina

Muze mwana wacho akolele, Yokepete yamutwala kuli mwana wa Falau, iye yamuluka jina lia Mose ni kumulela ngwe mwanenyi. Mose kakolele ngwe mwana wa mwanangana, nawa te mahasa kupwa ni chuma cheswacho mazanga. Alioze Mose kakavulamine Yehova. Kanyingikine ngwenyi, kapwile Ka-Izalele, hi Ka-Engitu ko. Kashika asakwile kuwayila Yehova.

Muze te hakumbanyisa miaka 40, Mose yakwata chiyulo chakukwasa atu jenyi. Muze Mose amwene Ka-Engitu kanalambe umwe ndungo Ka-Izalele, Mose yalamba Ka-Engitu wacho ni kumushiha. Mose yavumbika mufu wacho mu mavu. Muze Falau achinyingikine, yafupa kushiha Mose. Alioze Mose yachinyina ku chifuchi cha A-Midiane. Koko Yehova yamufunga.

“Ku ufulielo Mose . . . katayijileko akamuvuluke ngwo, Mwana wa mwana Falau wa pwo. Watongwele shinaho kwivwa lamba hamwe ni atu a Zambi.”—A-Hepreu 11:24, 25

Yihula: Kuchi A-Izalele te akwaalinga mu Engitu? Mumu liaka Mose achinyine mu Engitu?

Uputukilo 49:33; Kutuhuka 1:1-14, 22; 2:1-15; Yilinga 7:17-29; A-Hepreu 11:23-27

    Mikanda ya Chokwe (2008-2025)
    Fwambuka
    Njila
    • Chokwe
    • Tuma
    • Kululieka
    • Copyright © 2025 Watch Tower Bible and Tract Society of Pennsylvania
    • Shimbi Yakuyizachisa
    • Shimbi ja Kufunga Sango ja Mutu
    • Configurações de Privacidade
    • JW.ORG
    • Njila
    Tuma