Ayo Yehuka Chilakenyo Cho

Yehova yalweza Mose ngwenyi: ‘Kanduka ha mulundu ndo kuli yami. Mungusoneka shimbi jami ha mawe ni kujihana kuli yena.’ Mose yakanduka ha mulundu ni kutwaminyinako ha matangwa 40 ni ufuku. Muze te machitwaminyina, Yehova yasoneka Shimbi Kumi ha mawe ni kujihana kuli Mose.

Muze te hikwapalika amwe matangwa, A-Izalele yanyonga ngwo, Mose te kanashimbula chinji. Hachino, ayo yamba kuli Arone ngwo: ‘Tunafupu umwe hanga atusongwele. Tulingile umwe zambi hanga atusongwele!’ Arone yaamba ngwenyi: ‘Ngwehenu yingelengele ya oru.’ Iye yalulieka oru ni kuyilinga kaponya wa mwana-ngombe. Atu eswe yamba ngwo: ‘Mwana-ngombe yono mwe Zambi yetu yoze watutuhwishile mu Engitu!’ Ayo yaputuka kuwayila mwana-ngombe wa oru, nawa yamulingila chiwanyino. Shina chino chapwile chipi? Mba, mumu ayo kalakenyene kuwayila wika Yehova. Alioze kakalingile yize alakenyene.

Yehova kamwene yize te yinalingiwa, kashika yalweza Mose ngwenyi: ‘Sunuka haliapwila uye kuze kuli atu. Ayo hangwehuka nawa kanawayila zambi wa mahuza.’ Mose yasunuka ku mulundu, ni mawe aali a shimbi.

Muze te anakundama ku chilombo, Mose yevwa atu kanembe miaso. Mba yaamona kanakina ni kufulamana kuli mwana-ngombe. Mose yevwa uli unji. Yambila mawe hashi, mawe jacho yapaluka mu yihanda-yihanda. Hazehene iye yanongesa kaponya wacho. Chocho, yahula Arone ngwenyi: ‘Kuchi atu akwonga ni kwaatayiza kulinga chuma chamutapu au? Arone yakumbulula ngwenyi: ‘Kanda utenuka. Yena unanyingika chize atu wano apwa. Ayo te kanazange umwe zambi, kashika anehanga oru jo ni kujisa ha kahia ni kwaalingila zambi wacho!’ Arone kakazangile kuchilinga. Mose yafuna nawa ha mulundu koko yaliumba kuli Yehova hanga akonekene atu jenyi.

Yehova yakonekene waze eswe amwononokene ni mbunge yeswe. Shina muhasa kumona chize chapwile chilemu A-Izalele kukaula usongwelo wa Mose?