Umwe Wanangana Yiulihandununa

Hakupalika cha miaka muze Solomone te akuwayila Yehova, mu Izalele mwapwile sambukila. Alioze Solomone yalimbata ni mapwo anji aku yifuchi yikwo, nawa mapwo jacho te kakuwayila mahamba. Hakehe-hakehe Solomone yalumuka nawa yaputuka kuwayila mahamba. Yehova kevwile uli unji. Iye yalweza Solomone ngwenyi: ‘Wanangana wa Izalele ngukauchiza mu usoko we ni kuuhandununa mu yisuho yaali. Mungukahana chihanda chinene kuli kavumbi ke, alioze usoko we muukayula wika chihanda chikehe.’

Yehova yasolola kanawa chiyulo chenyi mu mutapu ukwo nawa. Umwe wa kuli tuvumbi a Solomone, Jeroboame, kapwile mu wenyi muze alitakanyine ni profeta Ahija. Ahija yasuwa chikuto chenyi mu yihanda 12 ni kulweza Jeroboame ngwenyi: ‘Yehova makachiza wanangana wa Izalele mu usoko wa Solomone ni kuuhandununa mu yisuho yaali. Yena tambula yihanda yino 10, mumu mupwa mwanangana wa minyachi 10.’ Muze Mwanangana Salomone achivwile yafupa kushiha Jeroboame! Hachino, Jeroboame yachinyina ku Engitu. Kulutwe, Solomone yafwa, chocho mwanenyi Rehoboame yapwa mwanangana. Mba Jeroboame yahiluka mu Izalele.

Makulwana amu Izalele yalweza Rehoboame ngwo: ‘Nyi mufunga kanawa atu, ayo mashishika kuli yena.’ Alioze masepa ja Rehoboame waze akolele nenyi hamuwika yamulweza ngwo: ‘Ena watamba kupwa ni yitanga yikalu hali atu! Pwako ni kwaaha milimo yikalu!’ Rehoboame yapanjika chiyulo cha masepa jenyi akweze. Iye yaputuka kumwesa atu lamba, hachino, atu yalimika nenyi. Atu yapwisa Jeroboame mwanangana wa minyachi 10, uze te avuluka ngwo wanangana wa Izalele. Wa minyachi yikwo yaali te kauvuluka ngwo wanangana wa Yunda, ayo kanungine ni kushishika kuli Rehoboame. Chenacho che minyachi 12 ya Izalele yalihandunwine.

Jeroboame kakazangile hanga atu jenyi aye ni kuwayila ku Yerusaleme, kuze kwapwile wanangana wa Rehoboame. Unanyingika mumu liaka? Mumu Jeroboame kapwile ni woma ngwo, ayo te mahasa kumwehuka ni kukwasa Rehoboame. Kashika alingile ana-ngombe aali a oru ni kulweza atu jenyi ngwenyi: ‘Yerusaleme yili kusuku chinji. Hachino munuhasa kuwayila munomwene.’ Atu yaputuka kuwayila ana-ngombe a oru, chocho yavulama nawa Yehova.