Ezere Yalongesa Shimbi ya Zambi

Kwapalikile miaka 70 chize haze A-Izalele anji afunyine ku Yerusaleme, chipwe chocho, amwe kapwile ni kutwama ku yihela yalisa mu Wanangana wa Persia. Umwe wa kuli ayo te sasendote Ezera, yoze walongesele atu Shimbi ya Yehova. Ezera kanyingikine ngwo atu mu Izalele kakapwile ni kukaula Shimbi, chocho yazanga kuyako hanga akaakwase. Mwanangana wa Persia Artasherke yamulweza ngwenyi: ‘Zambi hakupwisa mukwa-mana hanga ukalongese Shimbi yenyi. Yako, nawa fupa mutu mweswawo mazanga kuya ni yena.’ Ezera yaliwana ni eswe waze te anazange kufuna ku Yerusaleme. Ayo yalemba kuli Yehova hanga aafunge mu wenyi wo, chocho yaya kwo.

Hakupalika cha tukweji awana, ayo yaheta ku Yerusaleme. Yilolo waze awanyineko yalweza Ezera ngwo: ‘A-Izalele kanehuka Yehova nawa kanalimbate ni mapwo waze akuwayila tuzambi a mahuza.’ Yika Ezera alingile? Ezera yafulamana ni kulemba kulutwe lia atu eswe ngwenyi: ‘Yehova, hiwalinga yuma yinji hali yetu, alioze nihindu twakuvulumuna kuli yena.’ Atu hanalikonyeka, alioze, kananungu ni kulinga yuma yize kuyalitele. Ezera yasakula makulwana ni akwa-kuyula hanga atale yikuma yacho. Hakupalika cha tukweji atatu, atu eswe waze kakapwile ni kuwayila Yehova yaahanga.

Miaka kumi ni aali yiyipalika. Chocho, yipanga yeswe ya Yerusaleme yayitungulula. Hachino, Ezera yakungulula atu eswe ha mbunga hanga aatangile Shimbi ya Yehova. Muze Ezera azulwile mukanda, atu eswe yamana. Iye yahalisa Yehova, chocho atu yazundula moko hanga asolole utayizo wo. Mba, Ezera yatanga ni kulumbununa Shimbi, nawa atu yamupanjika kanawa. Ayo yatayiza ngwo kehukile nawa Yehova, chocho yaputuka kulila. Ha tangwa lize liasulileho, Ezera yaatangila nawa Shimbi. Ayo yanyingika ngwo te kwasala hakehe hanga alinge Chiwanyino cha Yisakila. Hazehene, atu yaputuka kululieka chiwanyino chacho.

Ha matangwa shimbiali a chiwanyino, atu yawahilila ni kusakwila chinji Yehova mumu lia mbuto yipema. Kukwakapwile nichimwe Chiwanyino cha Yisakila ngwe chino, kukatuka ha mashimbu a Yoshua. Muze chiwanyino chahwile, atu yalikungulula nawa ni kulemba ngwo: ‘Yehova, watulamwine ku undungo, watulishile mu puya nawa watwehele chifuchi chipema. Alioze hita shimbu, yetu twakukwehuka. Watumine aprofeta hanga atukolweze, alioze kutwaapanjikile. Nihindu, wakutusolwela uhumikizo. Wamanunwine chilakenyo che hali Apalahama. Haliapwila tunakulakenya ngwetu mutukwononokena.’ Ayo yasoneka chilakenyo cho, chocho yilolo, A-Levi, ni asasendote yasaho chilayi.