Yipanga ya Yerusaleme

Tufunenu ha yimwe miaka kunyima. Nehemia, kavumbi wa Mwanangana Artasherke, kapwile Ka-Izalele yoze te watwama mu Persia mu mbonge ya Shushane. Ndumbu wa Nehemia yakatuka ku Yunda yamutwalila sango jipi ngwenyi: ‘Atu waze afunyine ku Yerusaleme keshi ni ukulungunga. Yipanga ya mbonge ni yajilo yize A-Babilonia apihishile ni haliapwila kanda achiyitungulula.’ Nehemia yevwa kupiha. Iye yazanga kuya ku Yerusaleme, chocho yalemba hanga mwanangana amweche ayeko.

Kulutwe, mwanangana yamona ngwenyi Nehemia te kananenganyana chinji. Iye yamuhula ngwenyi: ‘Kanda nguchikumona chize ni limwe tangwa. Yika yapihako?’ Nehemia yamba ngwenyi: ‘Mumu liaka nguhona kunenganyana nyi mbonge yami, Yerusaleme, yinachipiha ni haliapwila?’ Mwanangana yamba ngwenyi: ‘Yika unazange hanga ngukulingile?’ Hazehene, Nehemia yalemba mu mbunge. Mba hi yamba ngwenyi: ‘Lisesa, ngweche kama hanga nguye ku Yerusaleme ni kutungulula yipanga ya mbonge.’ Mwanangana Artasherke yalweza Nehemia hanga aye, nawa yamukwasa hanga ahase kulinga kanawa wenyi. Yapwisa nawa Nehemia nguvulu wa Yunda ni kumwaha mapaya a yajilo ya mbonge.

Muze Nehemia ahetele ku Yerusaleme, iye yahengwola yipanga ya mbonge. Chocho, yalweza asasendote ni miata ngwenyi: ‘Yino yili ponde yinene. Kashika twatamba kuputuka mulimo.’ Atu yatayiza, chocho yaputuka mulimo wa kutungulula yipanga.

Alioze amwe akwa-kole yaputuka kulenya A-Izalele, ni kwaamba ngwo: ‘Mukuza mahasa kupuzula chipanga chize nunatungulula.’ Atu waze te anatungu yalengulula matuka jacho, chocho yanunga ni mulimo wo. Chipanga yichisuhwa nawa yichikola.

Akwa-kole yakwata chiyulo chakuyila sali lieka hanga alukukile Yerusaleme cha kwaatungumwisa. Muze A-Yunda anyingikine chiyulo chacho, ayo yevwa woma. Alioze Nehemia yamba ngwenyi: ‘Kanda nwivwa woma. Yehova kali ni yetu.’ Yatuma tufunga hanga afunge akwa-milimo, chocho akwa-kole kakahashile kwaalukukila.

Yipanga ni yajilo yahwisa kuyitunga ha matangwa 52. Nehemia yaneha A-Levi eswe ku Yerusaleme hanga ayihane kuli Yehova. Yaalulieka mu yizavu yaali ya akwa-kwimba. Ayo yanyina ha ndalo ndo helu lia chipanga ku Chajilo cha Kulutwe nawa yaya sali likwo lia mbonge. Yembila Yehova yitavwi, sembalu ni tulialia. Ezera yaya hamwe ni chimwe chizavu, Nehemia neye yaya ni chikwo ndo haze aliwanyine mu tembele. Atu eswe—malunga, mapwo ni ana yahana milambu kuli Yehova nawa yalinga chiwanyino. Lundunjila wa maliji a chiseke yaheta kusuku.