Yesu Yenda Helu Lia Meya

Yesu kakawukile wika mieji ni kuhindwisa afu, alioze te kakwete nawa ndundo ja kusongwela fuji ni vula. Muze te hahwisa kulemba ha mulundu, Yesu yatala mu Kalunga-Lwiji wa Ngalileya nawa yamona kangonga. Apostolo jenyi te kali mu wato, kanapinda hanga alilamwine ku fuji. Yesu yapalumuka nawa yaputuka kwenda helu lia meya ni kuya ku wato. Muze apostolo amwene mutu kanende helu lia meya, ayo yevwa woma. Alioze Yesu yaamba ngwenyi: ‘Yami ngunezako. Kanda nwivwa woma.’

Petulu yamba ngwenyi: ‘Mwene, nyi yena lume, ngulweze hanga ngwize kuli yena.’ Yesu yamulweza ngwenyi: ‘Tweya kuli yami.’ Hachino, muze ahetele hakachi ka kangonga, Petulu yasunuka mu wato ni kuputuka kwenda helu lia meya ni kuya kuli Yesu. Alioze, muze te haheta hakamwihi ni Yesu, Petulu yatala ku kangonga, chocho yaputuka kwivwa woma. Muze hevwa ngwo kanashimbama, Petulu yakololoka ngwenyi: ‘Mwene, ngulamwine kama!’ Yesu yamukwata ku kwoko ni kumwamba ngwenyi: ‘Mumu liaka te unahamika? Ufulielo we kulihi uli?’

Yesu ni Petulu yanjila mu wato, hazehene kangonga yahwa. Shina muhasa kunyonga chize apostolo evwile? Ayo yamba ngwo: “Pundu lume yena uli Mwana wa Zambi.”

Hi ha shimbu lino wika ko Yesu aholesele tachi ja yitangiwa. Ha shimbu likwo, muze Yesu ni apostolo jenyi ayile sali likwo lia kalunga-lwiji, Yesu yapomba kunyima lia wato. Muze te ali mu tulo, kangonga wa tachi yaputuka. Miavu yiyiputuka kulamba ku wato, nawa wato yiuzala ni meya. Apostolo yahindwisa Yesu ni kukolwojoka ngwo: ‘Longeshi, tunambe kufwa! Tukwase kama!’ Yesu yahinduka ni kwambila kalunga-lwiji ngwenyi: “Hola!” Hazehene, fuji ni kalunga-lwiji yiyihola. Yesu yahula apostolo jenyi ngwenyi: ‘Mba ufulielo wenu ulihi?’ Ayo yaliamba umwe ni mukwo ngwo: “Chipwe fuji ni kalunga-lwiji yinamwononokena.” Apostolo yanyingika ngwo, nyi mafuliela muli Yesu ni mbunge yeswe, kukushi nichimwe chize mucheevwisa woma.