Tumbaji Yatambula Spiritu Yisandu

Hakupalika cha matangwa kumi muze Yesu te hafuna mu malilu, tumbaji twenyi yatambula spiritu yisandu. Yino yalingiwile ha Pentekoste ya mwaka 33 M.J., nawa atu aku yihela yinji te kaneza ku chiwanyino mu Yerusaleme. Kwapwile wika tumbaji twa Yesu 120, waze alikungulwile mu zuwo mu chipatulo cha kwilu. Susumuku yikulingiwa chikomokeso. Chimwe chuma ngwe mulengi wa kahia yichisoloka ha mutwe wa kambaji mweswe, chocho ayo eswe yaputuka kuhanjika malimi eka ni eka. Chimwe kukulunguza chinene yichivwakana mu zuwo lieswe.

Atu waze apwile ni kukatuka ku membo akwo ni kuya mu Yerusaleme yevwa zungo liacho, chocho yayako hanga atale yize te yinalingiwako. Ayo yakomoka muze evwile tumabji kanahanjika mu malimi jo. Yamba ngwo: ‘Atu wano ngwami kali A-Ngalileya. Mba kuchi anahase kuhanjika malimi jetu?’

Hachino, Petulu ni apostolo akwo yamana kulutwe lia mbunga. Petulu yalweza atu chize Yesu amushihile nawa ngwenyi Yehova te hamuhindwisa ku ufwe. Yamba ngwenyi: ‘Haliapwila Yesu kali mu malilu ku sali lia chindume lia Zambi, nawa hi hatwaha spiritu yisandu yize alakenyene. Kashika nwevwa ni kumona yikomokeso yino.’

Maliji a Petulu yakwata chinji ku mbunge ja atu, chocho ayo yahula ngwo: ‘Yika twatamba kulinga?’ Iye yaamba ngwenyi: ‘Likonyekenu anupapachise mu jina lia Yesu. Mba ni yenu nutambule spiritu yisandu.’ Ha tangwa liacho, yapapachisa atu 3,000. Kukatuka ha shimbu liacho tumbaji yaputuka kwoka chinji mu Yerusaleme. Ni ukwaso wa spiritu yisandu, apostolo yazulula yikungulwila yinji muze te mahasa kulongesela tumbaji yuma yeswe yize Yesu aalwezele.