Mukanda wa Chizavu cha Tusongo

Mandumbu Jetu Azango:

Amu tuli tuvumbi twa Yehova, twakuzanga chinji Liji lienyi, Mbimbiliya. Tuli ni shindakenyo ngwetu, Mbimbiliya yikwete sango jamwenemwene, usongwelo ungunu ku mwono ni zango lingunu lize Yehova akwete hali atu. (Samu 119:105; Luka 1:3; 1 Yoano 4:19) Tunazange chinji kukwasa akwetu hanga anyingike umwenemwene ulemu uze uli mu Liji lia Zambi. Mba tuhase kuchilinga, twatuhwisa mukanda uno, Yize Muhasa Kulilongesa mu Mbimbiliya. Tukaule hanga tukulweze chikehe hakutwala ku mukanda uno.

Mukanda uno kanji-kanji kausonekena twanuke. Alioze, muuhasa nawa kukwasa makulwana waze anazange kulilongesa chinji hakutwala ku Mbimbiliya. Nawa, amu Mbimbiliya yili mukanda wa atu eswe, kashika yetweswe mutuyuka muze mutuhengwola sango ja mukanda uno, mumu hita longeso liamo mulihasa kutukwasa hanga tupwe ni uwahililo wamwenemwene.

Ha kuzachisa sango ja mu Mbimbiliya, mukanda uno unasolola sango ja atu kukatuka kuuputukilo ndo hakupalika cha matangwa. Kwafupiwile tachi jinji mba alulieke malongeso amu Mbimbiliya hanga apwe zwalala nawa ashi, ha kukaula chize hita chuma chapwile ni kulingiwa.

Mukanda uno, unalumbununa ni kusolola kanawa sango ja mu Mbimbiliya. Sona ni yizulie yaho, kayiluliekele mu mutapu uze muyihasa kuhana mwono ku sango ja mu Mbimbiliya ni kutuhwisa manyonga ja waze anasololaho.

Mukanda uno muutukwasa hanga tumone chize Mbimbiliya yili umwe mukanda uze unahanjika hakutwala kuli atu waze ononokene Yehova ni waze kakachilingile. Nawa muutukwasa hanga tulilongese ha yilweza yo. (A-Roma 15:4; 1 Korindu 10:6) Mukanda uno uli wakuteta mu yihanda 14. Ku uputukilo wa hita chihanda, chinalumbununa malongeso waze mutuwanaho.

Nyi uli chisemi, muhasa kutanga limwe longeso hamwe ni mwane ni kushimutwina yizulie yize yiliho. Nawa yenweswe aali munuhasa kutanga yisoneko ya Mbimbiliya haze hanakatuka longeso liacho. Kwasa mwane hanga atese yize anatange mu Mbimbiliya ni yize yili ha longeso lia mukanda uno. Mutuhasa kupwa ni nyonga lioliene muze mutukwasa umwe mukulwana hanga anyingike kanawa sango ja mu Mbimbiliya.

Tunashimbwila ngwetu, mukanda uno muukwasa atu eswe waze akwete mbunge yingunu—twanuke ni makulwana, hanga alilongesa Liji lia Zambi ni kukaula hita longeso ku mwono wo. Nyi mutulinga chocho, ni ayo mahasa kuwayila Zambi ni kupwa mu usoko wenyi wa zango.