Atu Anji Makaalamwina ku Songo​—Ni Yena Mahasa Kukulamwina

Mbimbiliya yinatulweze ngwo songo mulikeza ni kwonwona: “Kumukukapwa luyinda munene, yoze kanda amoneka hano hashi chize ku uputukilo wa hashi ndo haliapwila . . . Nyi kachi katepulwile matangwa aze, kachi niumwe kechi kalilamwina.” (Mateu 24:21, 22) Alioze Zambi kanalakenya ngwo atu anji makapwa kulamwina: “Ya hashi muyipalika . . . , alioze yoze malinga upale wa Zambi matwama ndo ku miaka ya mutolo.”​—1 Yoano 2:17.

Nyi tunazange atulamwine ha kupalika cha yuma ya hashi ni kutwama ni ‘mwono wa mutolo,’ yika twatamba kulinga? Shina twatamba kuputuka kutulika upite hanji kufupa ukwaso ukwo wa yuma ya ku musunya nyi? Ka. Mumu Mbimbiliya yinatutoweza hanga tufupe yuma yakacheka. Tunatange chino: “Se yino yuma yeswe chocho muyikajindwoka, chanutamba kupwa ni kwenda chisandu ni uwayilo. Ni kutalatala, nikupwisa kuheta cha tangwa lia Zambi.” (2 Petulu 3:​10-​12) Maliji wano kanasolola ngwo, “yuma yeswe” yize muyikajindwoka kali manguvulu akalimbalimba ni atu eswe waze akukwasa manguvulu jacho kuhiana Zambi. Kwamba umwenemwene, nyi mutufupa wika kutulika upite, yino yichikatulamwina ha unongeso wacho.

Chochene, ulamwino wetu unalumbunuka kulihana kuli Yehova Zambi ni kulilongesa hakutwala ku yitanga yize yakumwivwisa kuwaha. (Zefania 2:3) Kanda tukaula atu waze akwete yitanga yipi ni kulengulula yilayi yize yinasolola ngwo tuli ha mashimbu alemu chinji, alioze twatamba “kununga ni kunyonga kuheta cha tangwa lia Yehova.” Yela ja Yehova mahasa kukukwasa kupalikila mu Mbimbiliya chize muhasa kulilamwina ha tangwa lize lineza.