Shina Kuli Umwe Yoze Wakwivwa Kulemba Nyi?

Amwe atu kakumona ngwe kulemba chili kukisa mashimbu, mumu ngwo kukushi niumwe yoze wakwivwa kulemba. Akwo ngwo haneseka kulemba alioze keshi kuwana kumbululo. Umwe ateu, yalumba limwe nyonga hakutwala ku kupwa cha Zambi, ha kulemba ngwenyi: “Achingukumbulule kama hakehe.” Alioze aye yamba ngwenyi Zambi yanunga ni “kuhola kulu.”

Alioze, Mbimbiliya yinashindakenya ngwo kuli Zambi yoze wakwivwa kulemba. Mbimbiliya yakusolola lusango yono wa atu ahakale: “[Zambi] kumakapwa ni vumbi kuli yenu ha kwivwa muteto wenu. muze mevwa manukumbulula.” (Izaia 30:19) Versu yikwo ya mu Mbimbiliya yinambe ngwo: “Kulemba cha mukwa ululi chamuwahilila chinji.” —Yishima 15:8.

Mbimbiliya yinasolola nawa yilweza ya atu waze Zambi akumbulwile yilemba yo. Yimwe versu ya mu Mbimbiliya yinambe ngwo Yesu kalembele “kuli yoze wahasa kumulamwina ku kufwa.” (A-Hepreu 5:7) Yilweza yikwo, mutuhasa kuyiwana ha mukanda wa Daniele 9:21 ni 2Sango ja Mianangana 7:1.

Mba mumu liaka amwe atu akumona ngwe kulemba cho keshi kuchikumbulula? Mba kulemba chetu achivwe, twatamba kulemba wika kuli Zambi wa mu Mbimbiliya, Yehova,a kanda tulemba kuli tuzambi tweswatwo chipwe kuli tulamba. Zambi kakuzanga nawa hanga twite “chuma chimwe cha kulita ni upale wenyi”—yuma yize iye akutayiza. Zambi kanatulakenya ngwo, nyi twalemba nikulita ni chize iye anazange, “aye matwivwa.” (1Yoano 5:14) Ha chino, mba kulemba chetu achivwe, yetu twatamba kunyingika Zambi wa mu Mbimbiliya ni kulilongesa upale wenyi.

Atu anji kakufuliela ngwo, kulemba kuchatalile wika kuli atu waze kuya ku ulembelo, alioze Zambi kakwivwa kulemba nawa kakumbulula. Isaac wa mu Kenya yamba ngwenyi: “Ami nalembele hanga ngunyingike kanawa Mbimbiliya. Hi chashimbwile chinji yikusoloka umwe mutu yoze wangukwashile kuyinyingika. Mu Filipinas Hilda yazanga kwecha kunwa makanya. Muze hafunyina-funyina kulinga upi wowene, mukwo-lunga yamwamba ngwenyi, “Mumu liaka kushi kulemba kuli Zambi hanga akukwase kama?” Aye yakaula shimbi yacho nawa yamba ngwenyi: “Nakomokene ha chize Zambi angukwashile. Chino chalingiwile muze naputukile kuhona usolo wa kunwa makanya. Chocho, yinguhasa kwecha kunwa makanya.”

Shina Zambi mahasa kukukwasa ku mwono we ha kulinga yuma yize yalita ni upale wenyi nyi?