Mumu Liaka Zambi Akutwita Hanga Tulembe?

Zambi kanazange hanga tupwe masepa jenyi.

Masepa apema kakuhanjika umwe ni mukwo hanga akolese usepa wo. Chochene nawa Zambi kanatwite hanga tuhanjike nenyi, mba tupwe ni usepa upema ni iye. Zambi kanambe ngwenyi: “Munutambika kuli yami, nikwiza ni kulemba kuli yami mba mungunwivwa.” (Jeremia 29:12) Kashika, ni enu, nyi munuhanjika ni Zambi, ‘mukundama kuli iye, mba iye kumakundama kuli yenu.’ (Tiangu 4:8) Mbimbiliya yinatulweza pundu ngwo: “Yehova hakamwihi ali ni waze eswe akutambika kuli iye.” (Samu 145:18) Kashika nyi twalemba chinji kuli Yehova usepa wetu ni iye muukola chinji.

Zambi kanazange kunukwasa.

Yesu kambile ngwenyi: “Hanji mutu muka, kachi mwanenyi mamwita mbolo, aye mamwaha liwe? Hanji kachi meta yishi, mamwaha kapela? Mba kama yenu nuli api, nunanyingika kuhana yawana yipema kuli ana jenu, kuma Tatenu yoze uli mu malilu kechi kuhana yuma yipema kuli waze mamwita, nyi?” (Mateu 7:9-11) Chochene, Zambi kanatwite hanga tulembe ‘mumu iye kakutufunga’ nawa kanazange kutukwasa. (1 Petulu 5:7) Nawa iye kanatwite hanga tuye kuli iye hamwe ni milonga yetu. Mbimbiliya yinatulweze ngwo: “Kanda nukalipikala ha chuma nichimwe; alioze ha yuma yeswe ku kulemba ni kuliumba hamwe ni kusakwila, kwita chenu akachinyingike kuli Zambi.”—A-Fwilipu 4:6.

Atu kanafupu ukwaso wa ku spiritu.

Akwa-mana waze akulilongesa hakutwala ku kupwa cha atu kanambe ngwo tununu twa atu kakuzanga kulemba. Chipwe amwe atu waze akwamba ngwo Zambi katwamineko, ni waze akwamba ngwo kechi kuhasa kunyingika kuze Zambi atwama no kakuzanga kulemba.a Yikuma yino yinasolola ngwo Zambi katangile atu ni nyonga lia kufupa kulia cha ku spiritu. Yesu yamba ngwenyi: “Kawaha yiswale mu spiritu, mumu wanangana wa malilu niwo.” (Mateu 5:3) Yimwe jila yakuhwishilamo uswale wetu wa ku spiritu yili kulemba mashimbu kuli Zambi.

Nyi twatayiza ukolwezo wa Zambi hanga tulembe kuli iye, yika mutuhasa kuyuka?