Kumbululo Lia Yihula Ya Mbimbiliya

Shina afu makahindwisa nyi?

Yehova Zambi mwe Shima lia mwono. (Samu 36:9) Nyi Zambi mwe shima lia mwono, shina iye kechi kuhasa kuhindwisa atu waze afwile kulu nyi? Mbimbiliya yinatulweza ngwo Zambi che makalinga, kulutwe lia matangwa. (Tanga Yilinga 24:15) Mba mumu liaka iye makahindwisa atu?

Sakatanga wetu kazangile hanga atu atwame hashi ku miaka yeswe. (Uputukilo 1:31; 2:15-17) Chino che Zambi anazange hakutwala kuli atu. Alioze iye kakwivwa yikola ku mbunge hakumona chize twakupinda ni lamba musono, kashika aye kanazange kuhwisa lamba liacho kawashi-washi.—Tanga Yombi 14:1, 14, 15.

Atu waze makahindwisa kulihi makatwama?

Shina Zambi katangile atu hanga atwame mu malilu nyi? Ka. Aye katangile angelo hanga atwame mu malilu. Alioze atu kaatangile hanga atwame hano hashi. (Uputukilo 1:28; Yombi 38:4, 7) Ha chino, tutalenu kuze Yesu ahindwishile atu. Iye kahindwishile atu hano hashi. Kashika, atu anji waze makahindwisa kulutwe lia matangwa makatwama hano hashi.—Tanga Yoano 5:28, 29; 11:44.

Alioze, Zambi kakusakula amwe atu akehe waze mahindwisa hanga akatwame mu malilu, ayo makapwa angelo. (Luka 12:32; 1 A-Korindu 15:49, 50) Atu jacho makayula hashi hamwe ni Yesu ngwe mianangana.—Tanga Usolwelo 5:9, 10.