MALONGESO A CHIFUKILO | MUMU LIAKA TWATAMBA KUPWA NI MBUNGE YIPEMA?

Chize Yitanga ya Kuhona Mbunge Yipema Muyihasa Kutupinjisa

“Kuli yimwe yuma yikalu yize mutuhasa kuyihwisa ni yimwe ndambu ya mahuza.”—Samantha, Africa Sul.

Shina muhasa kutayiza maliji wano? Chizechene ngwe Samantha, yetu eswe hitunapu kama mu yuma yacho yikalu. Yitanga yize mutusolola muze matweseka hanga twonge muyihasa kusolola kuli yetu yuma yize twakulemesa ku mwono wetu. Chakutalilaho, nyi twafupa kufunga utu wetu ngwe chuma chilemu chinji, mutumona ngwetu yitanga ya mahuza yili yimwe jila yakululiekelamo yuma yize tunazange ku mwono wetu. Alioze muze umwenemwene muusoloka, yitanga ya mahuza yakuneha lamba linji. Tutalenu maliji awa.

KUHONA MBUNGE YIPEMA CHAKUPIHISA USEPA

Kuhanjika umwenemwene chakukolesa usepa. Nyi atu aali malijikijila umwe ni mukwo kakutwama kanawa. Ujikijilo ushi kwiza susumuku. Atu kakukolesa usepa wo muze matwama mashimbo anji chimuwika, mahanjika umwenemwene kuli umwe ni mukwo, ni kusolola yitanga yize kuyishi kuzo. Ujikijilo muhasa kupihia, chipwe muze mutwonga mukwetu kamuwika. Ujikijilo muze muuhwa muchihasa kupwa chikalu kupwa nawo nawa.

Shina ena hanakwongo kama kuli umwe sepa yoze te wazanga chinji? Nyi hichinalingiwa, kuchi wevwile? Kota wevwile yinyengo yinji mu mbunge, mumu kakwongele. Alioze tunanyingika ngwetu chili chikalu chinji hachize wevwile. Atu anji kakuhangulula ngwo mahuza keshi kuhasa kupihisa usepa uze upema.

KUHONA MBUNGE YIPEMA CHAKUSEMA MAHUZA

longeshi Robert Innes wa ku universidade wa ku California yamba ngwenyi, “mahuza kakusambuluka.” Chino mutuhasa kuchitesa ni yimwe yikola yize yakusambuluka, nyi watwama ni mutu yoze wakulionga ni yena muhasa “kupwa” mukwa-mahuza.

Kuchi muuhasa kwehuka yitanga ya mahuza? Mbimbiliya muyihasa kukukwasa. Tutalenu jimwe shimbi yikehe ja mu Mbimbiliya.

Yitanga ya Kuhona Mbunge Yipema

Mahuza

YIKA? Kuhanjika yuma ya mahuza kuli mutu yoze te watamba kunyingika umwenemwene. Mahuza mahasa kulumbunuka nawa kwalumuna kulumba yuma hanji kuyisweka hanga wonge mutu, kusweka yuma yingunu hanga twonge mutu, nawa kwokesa sango jingunu hanga atunangamise kuli akwetu.

YIKA MBIMBILIYA YINAMBE: “Mumu mukwa kupiya kapwa chizelwokeso kuli Yehova, alioze kakulikata ni mukwa ululi.” (Yishima 3:32) “Kashika mbilenu mahuza. Hanjikenu umwenemwene mweswe ni mwenyembo wenyi.”—A-Efwesu 4:25.

Kalundanganyishi

YIKA? Kuhanjika yuma ya yasaki hanga atu anyonge yuma yipi hali mutu wacho.

YIKA MBIMBILIYA YINAMBE: “Mukwa kupiya kakuzundula ndombo; mukwa kalundanganyishi kakuhandununa masepa apema.” (Yishima 16:28) “Nyi kunyi kujishiko kahia mukajima; kuze kushi mukwa kalundanganyishi kulitachika muchikahwa.”—Yishima 26:20.

Kalimbalimba

YIKA? Kanalumbunuka kwonga mutu hanga alande chuma kuchapemene.

YIKA MBIMBILIYA YINAMBE: “Kanda numwesa lamba mukwa mulimo wa kufweta, chiswale, mukwa kuhona.” (Shimbi Yamuchaali 24:14, 15) “Wapinjisa yiswale wasaula Tangi yenyi, alioze mukwa kuvwila keke yiswale kakumulemesa.”—Yishima 14:31.

Wiji

YIKA? Kwanda chuma chambala chakuhona kumutuma kuli mwene.

YIKA MBIMBILIYA YINAMBE: “Yoze wapwile nikwiya kanda akeya nawa; alioze shinaho akakilikite, akalinge yipema ni moko jenyi, hanga akapwe ni chize cha kulianyina ni yoze mahona.” (A-Efwesu 4:28) “Kanda nulionga. . . . eji, chipwe akwa kwivwa kuzo, chipwe akwa kuzengewa, chipwe akwa kutukana, chipwe akwa kuhianyisa ndando, kechi kahinga wanangana wa Zambi.”—1 A-Korindu 6:9, 10.