UTULIKILO WA MIKANDA HA INTERNET wa Watchtower
Watchtower
UTULIKILO WA MIKANDA HA INTERNET
Chokwe
  • MBIMBILIYA
  • MIKANDA
  • KUKUNGULUKA
  • w16 no. 7 ma. 14-30
  • Kutesa Chilemu Chize Watamba Kulinga

Kukushi nichimwe chinema.

Lisesa, kwasoloka kapalia ha kwazulula chinema.

  • Kutesa Chilemu Chize Watamba Kulinga
  • Kaposhi wa Kutalila Kanambujola Wanangana (Wakulilongesa)—2016
  • Mitwe ya Yikuma
  • Yikuma Yalifwa
  • CHIZE MUTUHASA KUTESA UFULIELO WETU NI MALONGESO A MBIMBILIYA
  • Wanangana wa Zambi Yika?
    Yika Chamwenemwene Mbimbiliya Yakulongesa?
  • Wanangana wa Zambi Yika?
    Yika Mbimbiliya Muyihasa Kutulongesa?
  • Yesu Kristu Iya?
    Yika Chamwenemwene Mbimbiliya Yakulongesa?
Kaposhi wa Kutalila Kanambujola Wanangana (Wakulilongesa)—2016
w16 no. 7 ma. 14-30

Kutesa Chilemu Chize Watamba Kulinga

SHINA wakulimona ngwe uli mukwa-Kristu? Nyi chenacho, ena uli mukachi ka tununu aali a tununu twa atu hano hashi waze akwamba ni ushindakenyo weswe ngwo, kakukaula Kristu. Musono kuli mayingeleja anji waze akuvuluka ngwo kali akwa-kristu, alioze o kalihandununa mu malongeso ni ndako jeka ni jeka. Kashika ufulielo we muuhasa kulisa chinji ni wa atu akwo waze no akwamba ngwo kali akwa-kristu. Shina chili ni ulemu kunyingika kanawa yuma yize wakufuliela? Ewa, chili chilemu, nyi unazange kukaula Ukristu uze Mbimbiliya yakulongesa.

Tumbaji atangu a Yesu Kristu te kakwavuluka ngwo, “Akwa-Kristu.” (Yilinga 11:26) Te kukushi jina likwo lize te akwaavuluka, mumu te kwatwama ufulielo umuwika wa Ukristu. Akwa-Kristu eswe hamuwika te kakukaula malongeso ni shimbi ja yoze wahichikile Ukristu, Yesu Kristu. Mba yika mutwamba hakutwala ku yingeleja ye? Shina wakutayiza ngwe malongeso jamo kali waze Kristu alongesele nawa waze akwa-Kristu atangu te akufuliela? Kuchi muhasa kupwa ni ushindakenyo? Kuli jila yimuwika wika yakuchinyingikina—kuzachisa Mbimbiliya ngwe uteselo wa malongeso jacho.

Kaula yilweza yino: Yesu Kristu te kakuvumbika chinji Yisoneko ngwo yili Liji lia Zambi. Aye te keshi kutayiza atu waze te akwehuka malongeso a Mbimbiliya ha kukaula ndako ja atu. (Marku 7:9-13) Mutuhasa kwamba ngwetu, ufulielo wa tumbaji amwenemwene a Yesu wapwile ni kukatuka mu Mbimbiliya. Kashika mukwa-Kristu mweswe katamba kulihula ngwenyi, ‘Shina malongeso a mu yingeleja yami kalita ni amu Mbimbiliya?’ Mba ukumbulule chihula chino, mumu liaka watambile kutesa malongeso a mu yingeleja ye ni yize Mbimbiliya yinambe?

Yesu kambile ngwenyi, uwayilo wetu kuli Zambi watamba kukatuka ha umwenemwene, uze tunawane mu Mbimbiliya. (Yoano 4:24; 17:17) Nawa postolo Paulu kambile ngwenyi, ulamwino wetu unakatuka “ku chinyingi cha umwenemwene.” (1 Timoteu 2:4) Kashika chili chilemu ufulielo wetu ukatuke mu chinyingi chamwenemwene cha mu Mbimbiliya. Mumu ulamwino wetu uli mu cheseko!

CHIZE MUTUHASA KUTESA UFULIELO WETU NI MALONGESO A MBIMBILIYA

Tunakukolweza hanga utange yihula yisambano yize yinasulaho ni makumbululo a Mbimbiliya a yihula yacho. Hengwola yisoneko ya Mbimbiliya yize anatongola, nawa nyonga ha makumbululo jacho. Mba hi mulihula ngwe, ‘Kuchi malongeso a yingeleja yami analite ni yize Mbimbiliya yinambe?’

Kutesa chino muchihasa kukukwasa kunyingika yuma yize wafuliela. Shina unazange kutesa malongeso akwo a mu yingeleja ye ni yize Mbimbiliya yakulongesa? Yela ja Yehova mawahilila chinji kukukwasa kuhengwola kanawa umwenemwene wa Mbimbiliya. Eta longeso lia Mbimbiliya kuli Yela ja Yehova. Hanji kuya mu site yetu, jw.org.

1 CHIHULA: Zambi iya?

KUMBULULO: Yehova, Tato ya Yesu, kali Zambi wa mutolo nawa Sakatanga wa Ndundo-Jeswe yoze watangile yuma yeswe.

YIZE MBIMBILIYA YAKULONGESA:

“Twakusakwila kuli Zambi Tato ya Mwene wetu Yesu Kristu, nikunulembela matangwa eswe.”—A-Kolosu 1:3.

“Yenu kunwatela, Mwene wetu kanda Zambi yetu, kutambula uhenya ni ulemu ni tachi, mumu yenu nwatangile yuma yeswe.”—Usolwelo 4:11.

Tala nawa A-Roma 10:13; 1 Timoteu 1:17.

2 CHIHULA: Yesu Kristu iya?

KUMBULULO: Yesu Kristu kali Mwana mutangu wa Zambi. Yesu kamutangile, nawa kali ni uputukilo. Yesu kali mushi lia chiyulo cha Zambi nawa kakwononokena Zambi.

YIZE MBIMBILIYA YAKULONGESA:

“Mumu Tata iye munene wahiana yami.”—Yoano 14:28.

“[Yesu] mwenawo che kulifwa cha Zambi yoze keshi kumoneka, mwe swana wa yuma yeswe atangile.” —A-Kolosu 1:15.

Tala nawa Mateu 26:39; 1 A-Korindu 15:28.

3 CHIHULA: Spiritu yisandu yika?

KUMBULULO: Spiritu yisandu yili tachi jize Zambi akuzachisa hanga amanunune upale wenyi. Spiritu yisandu hi mutu ko. Atu mahasa kuzala too ni spiritu yisandu hanga apwe ni ndundo.

YIZE MBIMBILIYA YAKULONGESA:

‘Muze te Izabele hevwa kumeneka cha Maria, mwana-kemba yatumbuka mu jimo lienyi. Izabele wazalile too ni spiritu yisandu.’—Luka 1:41.

‘Alioze kumunukatambula tachi, muze spiritu yisandu muyiza hali yenu.’—Yilinga 1:8.

Tala nawa Uputukilo 1:2; Yilinga 2:1-4; 10:38.

4 CHIHULA: Wanangana wa Zambi yika?

KUMBULULO: Wanangana wa Zambi uli unguvulu wa mu malilu. Yesu kali Mwanangana wa mu Wanangana wacho. Kwasala hakehe hanga Wanangana wacho umanunune upale wa Zambi hashi heswe.

YIZE MBIMBILIYA YAKULONGESA:

“Mungelo wamuchishimbiali wembile chitavwi chenyi. Kwapwile maliji anene mwilu ngwo, Wanangana wa hano hashi hiwapwa wa Mwene wetu, ni wa Kristu wenyi: iye kumakayula ndo ku miaka yeswe ya mutolo.”—Usolwelo 11:15.

Tala nawa Daniele 2:44; Mateu 6:9, 10.

5 CHIHULA: Shina atu eswe apema kakuya mu malilu nyi?

KUMBULULO: Ka. Alioze kuli wika chizavu chikehe cha atu waze avuluka ngwo “mbunga yikepe” e no Zambi akusakula hanga aye mu malilu. Ayo hamwe ni Yesu makayula atu hano hashi ngwe mianangana.

YIZE MBIMBILIYA YAKULONGESA:

“Kanda nwivwa woma, yenu mbunga yikepe ya mapanga; mumu chinawahila Tatenu kunwaha we wanangana.” —Luka 12:32.

“Makapwa asasendote a Zambi ni a Kristu, makayula hamwe nenyi.”—Usolwelo 20:6.

Tala nawa Usolwelo 14:1, 3.

6 CHIHULA: Upale wa Zambi uka hano hashi ni hali atu?

KUMBULULO: Mu Wanangana wa Zambi, hashi heswe muhakapwa paraisu nawa atu ashishika makawahilila ni mijimba yingunu, sambukila hamwe ni mwono wa mutolo.

YIZE MBIMBILIYA YAKULONGESA:

“Yimbovu kumakahinga chifuchi. Kumakawahilila mu kulumbama cha sambukila.”—Samu 37:10, 11.

“Iye makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka: mumu yuma yitangu hiyinahu.”— Usolwelo 21:3, 4.

Tala nawa Samu 37:29; 2 Petulu 3:13.

    Mikanda ya Chokwe (2008-2025)
    Fwambuka
    Njila
    • Chokwe
    • Tuma
    • Kululieka
    • Copyright © 2025 Watch Tower Bible and Tract Society of Pennsylvania
    • Shimbi Yakuyizachisa
    • Shimbi ja Kufunga Sango ja Mutu
    • Configurações de Privacidade
    • JW.ORG
    • Njila
    Tuma