Shina Usongwelo wa mu Mbimbiliya uli ni Ulemu Musono?

AMWE KAKWAMBA NGWO, KA. Umwe ndotolo kambile ngwenyi, kwecha Mbimbiliya hanga yitusongwele chili ngwe kuzachisa mukanda wa ha mwaka 1920 hanga alongese nawo alongi sango ja quimica. Mutu yoze keshi kutayiza Mbimbiliya mahasa kukuhula ngwenyi, shina muhasa kuzachisa mukanda wa computador yikulu hanga ukusongwele ha kuzachisa computador yaha? Chekwamba ngwo, atu amwe kakumona ngwe Mbimbiliya yili mukanda ukulu chinji.

Mumu liaka mutu mahasa kuzachisa usongwelo wa mukanda wacho ukulu, ha mashimbu wano ayinyingi yinji yaha? Ngwami kuli sango jinji ha internet ni ha yisaji ya yinema. Ha TV kakusololaho akwa-mana anji ngwe waze ali ni yinyingi ya psicólogia, akwa-kuhanjika hakutwala ku mwono upema, ni akwa kusonejeka mikanda. Nawa kuli mikanda yinji yize yili ni sango ja ukwaso, mikanda yacho yakufwika mbongo jinji hakuyifwambwisa.

Kuli sango jinji jaha musono, mba mumu lia kuya ni kufupa usongwelo ha Mbimbiliya—mukanda ukulu uze akumbanyishine kusoneka ha 2,000 a miaka kunyima? Shina atu waze keshi kutayiza Mbimbiliya kakuhanjika umwenemwene ha kwamba ngwo, kuzachisa Mbimbiliya yitusongwele chili ngwe kuzachisa mukanda ukulu wa quimica hanji wa computador? Kwamba pundu, nyonga liacho lili lia saki. Ciencia ni tecnologia yakwalumuka kawashi, shina yize atu akufupa hiyalumuka? Atu ni haliapwila anachifupu ulemu wa mwono, kununga ni uwahililo ni ukulungunga, usoko upema, ni masepa angunu.

Chipwe ngwe Mbimbiliya yili yikulu, nihindu yakuhanjika ha yuma yino ni yikwo nawa. Yakusolola nawa ngwo, yili yakuhwima kuli Sakatanga wetu. Yakutusongwela ku mwono wetu ni kutukwasa kukumba yipikalo. (2 Timoteu 3:16, 17) Nawa malongeso jamo machinunga ha mashimbu eswe, ni ulemu wa yiyulo yamo kuushi kuhwa! Mbimbiliya yene yinambe ngwo: “Liji lia Zambi mwono lili nawo.”—A-Hepreu 4:12.

Shina sango ja mu Mbimbiliya mujihasa kupwa jamwenemwene? Shina Mbimbiliya yili mukanda ukulu, nyi yili ni ulemu unji kuhiana mikanda yikwo? Kaposhi wa Kutalila yono mutangu, kamululieka hanga akukwase kuwana kumbululo lia yihula yino.